වියට්නාමයේ පාලක කොමියුනිස්ට් පක්ෂය සිය මතවාද ප්රචාරය කිරීමේ ක්රමවේදය නවීකරණය කරමින්, සමාජ මාධ්ය ක්රියාකාරීන් (Influencers) සහ කෘතිම බුද්ධිය (AI) උපයෝගී කරගැනීමට සැලසුම් කර ඇති බව රොයිටර් පුවත් සේවය අනාවරණය කරයි. 2030 වසර වන විට අවම වශයෙන් ඉන්ෆ්ලුවන්සර්වරුන් 1,000කගේ ජාලයක් සහ කෘතිම බුද්ධි විශේෂඥයන් 5,000කගේ සහාය ලබාගැනීම මෙහි ඉලක්කය වී තිබේ. තරුණ පරපුර ඉලක්ක කරගනිමින් පක්ෂයේ “ධනාත්මක” පණිවිඩ සමාජගත කිරීම මෙහි ප්රධාන අරමුණයි.
මෙම නව උපායමාර්ගය මඟින් වියට්නාම භාෂාවෙන් අන්තර්ජාලය තුළ පවතින තොරතුරුවලින් 80%ක් පක්ෂයට හිතකර ධනාත්මක කරුණු බවට පත් කිරීමට බලධාරීන් අපේක්ෂා කරයි. එමෙන්ම පක්ෂයේ මාර්ගෝපදේශ උල්ලංඝනය කරන අන්තර්ගතයන්ගෙන් 90%ක් පැය 24ක් ඇතුළත ඉවත් කිරීම සඳහා කෘතිම බුද්ධි මෙවලම් යොදා ගැනීමට ද යෝජනා වී තිබේ. පක්ෂයේ ප්රතිපත්ති සරලව පැහැදිලි කිරීම සඳහා පොඩ්කාස්ට් (Podcasts) සහ කෙටි වීඩියෝ වැනි නවීන ආකෘතීන් භාවිත කිරීමට ද අවධානය යොමු වී ඇත.
ප්රචාරණ කටයුතු සඳහා නිර්මාණශීලීත්වය දිරිගැන්වීමට පක්ෂය උත්සාහ කළ ද, ඇතැම් අවස්ථාවලදී එය පාලනයෙන් බැහැර වීම පිළිබඳව රජය දැඩි අවධානයෙන් පසුවෙයි. නිදසුනක් ලෙස, පසුගිය අප්රේල් මාසයේදී ජනාධිපති ටෝ ලෑම් මහතා අගයමින් නිකුත් වූ ගීතයක්, ඔහුව වියට්නාමයේ නිර්මාතෘ හෝ චී මිංට සමාන කිරීම නිසා පක්ෂය තුළ නොසන්සුන්තාවක් ඇති විය. මේ හේතුවෙන් “නිසි දිශානතියක් නොමැති” සංස්කෘතික නිෂ්පාදන පිළිබඳව මාධ්ය වාර්තා නොකරන ලෙසට බලධාරීන් උපදෙස් දී ඇති බව ද වාර්තා වේ.
