ශ්රී ලංකා මහ බැංකුව සතු නිල සංචිත වත්කම් ප්රමාණය 2026 අප්රේල් මාසය අවසානයේදී නැවත වරක් අමෙරිකානු ඩොලර් බිලියන 7 සීමාවෙන් පහළට පැමිණ ඇති බව නවතම දත්ත වාර්තා පෙන්වා දෙයි. පසුගිය මාර්තු මාසය අවසානයේදී ඩොලර් මිලියන 7,026ක් ලෙස සටහන් වූ සංචිත ප්රමාණය, අප්රේල් මාසය නිමාවන විට ඩොලර් මිලියන 6,759ක් දක්වා 3.8%ක ප්රතිශතයකින් පහත වැටී තිබේ. මෙය අඛණ්ඩව දෙවන මාසයටත් මෙරට විදේශ සංචිතයේ වාර්තා වූ පසුබැසීමකි.
මහ බැංකු දත්තවලට අනුව සංචිත වත්කම්වල ප්රධාන අංගය වන විදේශ විනිමය සංචිතය ද අප්රේල් මාසය තුළ 4.3%කින් පමණ අඩු වී ඇති අතර, එය ඩොලර් මිලියන 6,800 සිට ඩොලර් මිලියන 6,505ක් දක්වා පහත වැටී ඇත. මීට අමතරව මහ බැංකුව සතු රන් සංචිතයේ වටිනාකම ද ඩොලර් මිලියන 222 සිට ඩොලර් මිලියන 219ක් දක්වා සුළු පහත වැටීමක් පෙන්නුම් කරයි.
වසර පහමාරකට පසුව මෙරට නිල සංචිත ප්රමාණය ප්රථම වතාවට ඩොලර් බිලියන 7 සීමාව ඉක්මවා ගියේ පසුගිය පෙබරවාරි මාසයේදී වුවද, ඉන් අනතුරුව මාර්තු සහ අප්රේල් මාසවලදී එය අඛණ්ඩව පහළ යාම විශේෂත්වයකි. මෙලෙස සංචිත ප්රමාණය අඩු වීම ඉදිරි ආර්ථික ක්රියාවලීන් සහ විදේශ ගෙවීම් සම්බන්ධයෙන් තීරණාත්මක සාධකයක් වනු ඇතැයි ආර්ථික විශ්ලේෂකයෝ පෙන්වා දෙති.
