ත්රීකුණාමලය කන්නියා උණුදිය උල්පත් ආශ්රිත ඓතිහාසික බෞද්ධ පුරාවිද්යා භූමිය කේන්ද්ර කරගනිමින් යළිත් වරක් දැඩි නොසන්සුන්කාරී වාතාවරණයක් නිර්මාණය වීමේ අවදානමක් මතුව තිබේ. වෙසක් පෝය දිනය නිමිති කරගෙන අදාළ පුරාවිද්යාත්මක වටිනාකමකින් යුතු භූමිය තුළ අනීතික ලෙස හින්දු ආගමික වතාවත් සිදු කිරීමට පිරිසක් සූදානම් වන බවට තොරතුරු අනාවරණය වී ඇත. අන්තවාදී කණ්ඩායම් විසින් සිදු කරනු ලබන මෙවැනි ආගම්වාදී ක්රියාවන්, ප්රදේශයේ පවතින සාමකාමී වාතාවරණයට දැඩි තර්ජනයක් එල්ල කරමින් අනවශ්ය ජාතිවාදී ගැටුම් ඇති වීමට පාර කපන බව පෙනී යයි.
බෞද්ධ ස්මාරක සහ නටබුන් සහිත මෙම සුවිශේෂී භූමිය තුළ හින්දු ආගමික වතාවත් බලහත්කාරයෙන් පැවැත්වීමට උත්සාහ කරන්නේ කාගේ වුවමනාවටද යන්න පිළිබඳව මේ වන විට දැඩි කතාබහක් නිර්මාණය වී ඇත. වඩාත් බරපතල කරුණ වන්නේ, පුරාවිද්යා දෙපාර්තමේන්තුවේ නිලධාරීන්ට පවා නීතිය නිසි ලෙස ක්රියාත්මක කිරීමට නොහැකි වන අයුරින් කිසියම් ඉහළ දේශපාලන හස්තයක බලපෑමක් එල්ල වී ඇති බවට තොරතුරු ලැබීමයි. මෙය රටේ පවතින පුරාවිද්යා පනත සහ උරුමයන් ආරක්ෂා කිරීමේ නීතිමය ක්රියාවලිය සෘජුවම අභියෝගයට ලක් කිරීමකි.
මෙම අර්බුදකාරී තත්ත්වය සම්බන්ධයෙන් වහාම නීතිය ක්රියාත්මක කරන ලෙස අදාළ බලධාරීන්ගෙන් ඉල්ලීම් කර ඇති අතර, වගකිවයුතු ආයතන මේ සම්බන්ධයෙන් ගන්නා ඉදිරි පියවර පිළිබඳව අප ඉතා අවධානයෙන් පසුවෙමු. ජාතික උරුමයන් ආරක්ෂා කිරීම සහ ජාතීන් අතර සමගිය පවත්වා ගැනීම වෙනුවෙන් බලධාරීන් අපක්ෂපාතීව කටයුතු කරනු ඇතැයි ජනතාව බලාපොරොත්තු වේ. ඕනෑම ආගමික බලපෑමකට වඩා රටේ නීතිය සහ ඓතිහාසික උරුමය සුරැකීම අත්යවශ්ය වන මොහොතක් උදා වී ඇත.
