15 හැවිරිදි බාලවයස්කාර දැරියක බරපතළ ලිංගික හිංසනයකට ලක් කළ බවට චෝදනා ලැබ සිටින අනුරාධපුර අටමස්ථානාධිපති පල්ලේගම හේමරතන හිමියන් සහ අදාළ දැරියගේ මව වහාම අත්අඩංගුවට ගෙන අධිකරණය හමුවට ඉදිරිපත් කරන ලෙස අනුරාධපුර ප්රධාන මහේස්ත්රාත් සියපත් සසිදු වික්රමරත්න මහතා අද (මැයි 08) නිට්ටඹුව පොලිසියට නියෝග කළේය. මීට අමතරව සැකකාර හිමිනමට විදෙස්ගතවීම වළක්වාලමින් ආගමන විගමන පාලකවරයා වෙත තහනම් නියෝගයක් ද අධිකරණය විසින් නිකුත් කරන ලදී.
ජාතික ළමාරක්ෂක අධිකාරියේ නිලධාරීන් අධිකරණය හමුවේ කරුණු දක්වමින් කියා සිටියේ මෙම අපරාධයට සම්බන්ධ සැකකාර හිමිනම අත්අඩංගුවට නොගැනීම පිළිබඳව අවස්ථා කිහිපයකදී පොලිසියෙන් විමසීම් කළ ද ඊට නිසි ප්රතිචාරයක් නොලැබුණු බවයි. අගතියට පත් දැරියට යුක්තිය ඉටුකිරීම සඳහා ජාතික ළමාරක්ෂක අධිකාරිය මෝසමක් මගින් මෙම නඩුව කැඳවීමට පියවර ගෙන තිබුණි. හිමිනමක සහ තවත් සැකකරුවන් දෙදෙනෙකු සම්බන්ධ මෙම බරපතළ ලිංගික හිංසන සිද්ධිය පිළිබඳ විමර්ශන ජාතික ළමාරක්ෂක අධිකාරියේ දැඩි අවධානයට ලක්ව ඇති බව ද මෙහිදී අවධාරණය කෙරිණි.
