බටහිර ආසියාවේ පවතින උණුසුම්කාරී තත්ත්වය හේතුවෙන් උද්ගත වී ඇති ගෝලීය බලශක්ති අර්බුදය හමුවේ ඉන්ධන පරිභෝජනය අවම කරන ලෙසත් අනවශ්ය වියදම් කපා හරින ලෙසත් ඉන්දීය අග්රාමාත්ය නරේන්ද්ර මෝදි එරට ජනතාවගෙන් ඉල්ලා සිටී. හයිද්රාබාද්හි පැවති ප්රසිද්ධ උත්සවයක් අමතමින් අග්රාමාත්යවරයා අවධාරණය කළේ පොදු ප්රවාහන සේවා, මෝටර් රථ හවුලේ භාවිතය (car-pooling) සහ විද්යුත් වාහන වෙත වැඩි වශයෙන් යොමු වීම කාලීන අවශ්යතාවක් බවයි. එමෙන්ම හැකි සෑම අවස්ථාවකදීම නිවසේ සිට වැඩ කිරීමේ (Work from home) ක්රමය නැවත ක්රියාත්මක කරන ලෙස ඔහු සමාගම්වලින් ඉල්ලීමක් කළේය.
ගෝලීය තෙල් මිල ඉහළ යාම නිසා ඇති වී තිබෙන ආර්ථික අවිනිශ්චිතතාව හමුවේ විදේශ විනිමය සංචිත සුරක්ෂිත කර ගැනීම සඳහා අනවශ්ය විදේශ සංචාර, විදේශයන්හි පවත්වන විවාහ උත්සව සහ අත්යවශ්ය නොවන රත්තරන් මිලදී ගැනීම්වලින් වැළකී සිටින ලෙස ද මෝදි මහතා ඉන්දීය පුරවැසියන්ගෙන් ඉල්ලා සිටියේය. මෙයට අමතරව රසායනික පොහොර භාවිතය 50% කින් අඩු කර ස්වාභාවික ගොවිතැන වෙත යොමු වන ලෙස ඔහු ඉන්දීය ගොවි ජනතාවට ද විශේෂ පණිවිඩයක් නිකුත් කර තිබේ.
ගල්ෆ් කලාපයේ සහ හෝමූස් සමුද්ර සන්ධියේ පවතින අස්ථාවරත්වය හේතුවෙන් සැපයුම් දාමයන්ට එල්ල වී ඇති බාධා හමුවේ ඉන්දියාව මේ වන විට දැඩි පීඩනයකට ලක්ව සිටී. මෙම අභියෝගාත්මක අවස්ථාවේදී රටේ ආර්ථිකය සුරක්ෂිත කර ගැනීම සඳහා පෞද්ගලික මට්ටමින් සිදු කරන කැපකිරීම් ජාතික වශයෙන් විශාල බලපෑමක් ඇති කරන බව අග්රාමාත්යවරයා වැඩිදුරටත් පෙන්වා දුන්නේය.
