වෙසක් සමයේ සිදු කරනු ලබන විවිධ සැරසිලි සහ දන්සැල් සංවිධානය කිරීමේදී පරිසරයට හානිකර පොලිතීන් සහ ප්ලාස්ටික් භාවිතයෙන් සම්පූර්ණයෙන්ම වැළකී සිටින ලෙස මධ්යම පරිසර අධිකාරිය සියලු ලක්වාසීන්ගෙන් ඉල්ලීමක් කරයි. විශේෂයෙන් වෙසක් පහන් කූඩු සැරසීම සඳහා සහ දන්සැල්වලදී ආහාර පාන ලබා දීම සඳහා භාවිත කරන තනි භාවිත ප්ලාස්ටික් සහ පොලිතීන් ද්රව්ය පිළිබඳව මෙහිදී දැඩි අවධානය යොමු කර තිබේ.
රජය විසින් නිකුත් කර ඇති ගැසට් පත්රවලට අනුව පොලිස්ටියරින් ආහාර බහාලුම්, ප්ලාස්ටික් බීම බට, කෝප්ප, පිඟන්, හැඳි, ගෑරුප්පු සහ ප්ලාස්ටික් මල්මාලා වැනි තනි භාවිත අයිතම මෙන්ම පොලිතීන් ලන්ච්ෂීට් විකිණීම, ප්රදර්ශනය හෝ භාවිතය නීතියෙන් තහනම් වේ. එසේම කිසියම් ආගමික, සංස්කෘතික හෝ සමාජයීය උත්සවයකදී සැරසිලි සඳහා පොලිඑතිලින් හෝ පොලිප්රොපිලින් නිෂ්පාදන භාවිත කිරීම ද දඬුවම් ලැබිය හැකි වරදක් බව එම අධිකාරිය අවධාරණය කරයි.
මෙම තහනම පැනවීමට ප්රධානතම හේතුව වී ඇත්තේ පොලිතීන් සහ ප්ලාස්ටික් මඟින් පරිසරයට සහ සෞඛ්යයට සිදුවන බරපතළ හානියයි. මෙම අපද්රව්ය ජල මාර්ගවලට බැහැර වීමෙන් ජල දේහ අපවිත්ර වීම, සතුන් විසින් ආහාරයට ගැනීමෙන් ඔවුන්ගේ ජීවිත අනතුරට පත්වීම සහ මයික්රො ප්ලාස්ටික් ශරීරගත වීමෙන් මිනිසාට විවිධ සෞඛ්ය සංකූලතා ඇති වීම මෙහිදී සිදුවේ. එසේම විවෘත පරිසරයේ මෙම කසළ දහනය කිරීමෙන් විෂ වායු පිටවීම ද ජෛව විවිධත්වයට සෘණාත්මක බලපෑම් ඇති කරයි.
සියලු සත්ත්වයන්ගේ සුවසෙත උදෙසා ධර්මය දේශනා කළ බුදුරජාණන් වහන්සේගේ තෙමඟුල සමරන වෙසක් සමයේ, පරිසරයට හානි නොවන ලෙස කටයුතු කිරීම සැමගේ වගකීමකි. එම නිසා හැකි සෑම විටම පරිසර හිතකාමී විකල්ප ද්රව්ය භාවිත කරන ලෙසත්, නොදිරන අපද්රව්ය භාවිත කිරීමට සිදුවුවහොත් ඒවා නිසි ලෙස බැහැර කිරීමට කටයුතු කරන ලෙසත් මධ්යම පරිසර අධිකාරිය වැඩිදුරටත් ඉල්ලා සිටියි.
