වත්මන් රජය කිසිදු ලෙසකින් වංචාවට හෝ දූෂණයට සම්බන්ධ වී නොමැති බවත්, තමන් සිදුකරන කටයුතු පිළිබඳව හෘද සාක්ෂියට එකඟව දැඩි විශ්වාසයක් පවතින බවත් එනිසා රජය නිදහස් වනු ඇතැයි ප්රකාශ කිරීමට තමන්ට පූර්ණ අයිතියක් ඇති බවත් නියෝජ්ය අමාත්ය සුනිල් වටගල මහතා පවසයි. විශේෂ සාකච්ඡාවකට එක්වෙමින් ඔහු අවධාරණය කළේ රජයක් ලෙස කිසිසේත්ම වංචාවට හෝ දූෂණයට අත තබා නැති අතර මින් ඉදිරියට ද ඊට කිසිදු ඉඩක් තබන්නේ නැති බවයි.සමගි ජන බලවේගයේ මන්ත්රීවරුන් විසින් ජනාධිපති අනුර කුමාර දිසානායක මහතා සහ අමාත්ය බිමල් රත්නායක මහතා විශේෂ කමිටුව හමුවට කැඳවන ලෙස මෝසමක් ඉදිරිපත් කළ බවත්, ඒ පිළිබඳව කමිටුව තුළ දීර්ඝ ලෙස සාකච්ඡා වූ බවත් නියෝජ්ය අමාත්යවරයා මෙහිදී හෙළි කළේය. කෙසේ වෙතත්, මේ වන විට සාක්ෂිකරුවන් හතර පස් දෙනෙකුගෙන් විමසා ඇති සාක්ෂි පරීක්ෂා කිරීමේදී ඔවුන් දෙදෙනා මෙම සිදුවීම්වලට සම්බන්ධ බවට කිසිදු කරුණක් අනාවරණය වී නොමැති බව ඔහු පෙන්වා දුන්නේය. මේ හේතුවෙන් නිකරුණේ ඔවුන්ව කමිටුව හමුවට කැඳවීමේ අවශ්යතාවක් නොමැති බව කමිටු බහුතරයේ තීරණය වී ඇත. එහෙත් අනාගතයේදී යම් හෙයකින් ඔවුන් සම්බන්ධයෙන් ප්රශ්නයක් මතු වුවහොත් ඔවුන්ව කැඳවීමේ අයිතිය කමිටුව සතු බව ද සභාපතිවරයා තීරණය කළ බව වටගල මහතා වැඩිදුරටත් සඳහන් කළේය.කමිටු ක්රියාකාරීත්වය පිළිබඳව අදහස් දක්වමින් ඔහු කියා සිටියේ එහි තොරතුරු රහසිගතව තබා ගැනීමට එකඟතාවයක් තිබුණ ද ජනතාව දැනුවත් කිරීමේ වගකීමක් තමන්ට ඇති බවයි. කමිටුව තුළ විපක්ෂ මන්ත්රීවරුන්ට වැඩි අවස්ථාවක් හිමිව ඇති බවත්, නාගහනන්ද කොඩිවක්කු සහ උදය ගම්මන්පිල වැනි අයගෙන් වැඩිපුරම හරස් ප්රශ්න ඇසුවේ විපක්ෂයේ මන්ත්රීවරුන් බවත් ඔහු මෙහිදී අනාවරණය කළේය.තමන්ට ලැබුණු ජනවරම අකුරටම ඉටු කරන බව පැවසූ නියෝජ්ය අමාත්යවරයා, අතීතයේ සිටි දූෂිතයන්ට එරෙහිව නීතිය ක්රියාත්මක කිරීමට රජය නොපැකිළිව කටයුතු කරන බව ප්රකාශ කළේය. හිටපු ජනාධිපතිවරුන්ට සහ වත්මන් මන්ත්රීවරුන්ට අදාළ පනත් ගෙන එමින් තමන් වචනයෙන් නොව භාවිතාවෙන් ජනවරම ඉටු කරන ආකාරය පෙන්වා දී ඇති බව ද ඔහු වැඩිදුරටත් කියා සිටියේය.
