මහා විහාරවංශික උඩරට අමරපුර මහා නිකායේ මහානායක ධුරයෙන් පිදුම් ලැබූ කෝට්ටේ මාදිවෙල ශ්රี ඥානානන්ද බෞද්ධ මධ්යස්ථානය සහ හපුතලේ නිකපොත සුභද්රාරාම පිරිවෙන් මහා විහාරය ඇතුළු විහාරගණයේ අධිපති, ශ්රී රතනජෝති වංශාලංකාර සද්ධර්මවාගීශ්වර ශාස්ත්ර විශාරද පණ්ඩිත මහෝපාධ්යාය අතිපූජ්ය නිකපොත චන්ද්රජෝති මහානාහිමිපාණන් වහන්සේ පිළිගැනීමේ සහ සන්නස් පත්ර ප්රදානය කිරීමේ උත්කර්ෂවත් රාජ්ය උත්සවය ඊයේ (17) කොළඹ බණ්ඩාරනායක අනුස්මරණ ජාත්යන්තර සම්මන්ත්රණ ශාලාවේදී (BMICH) ඉතා උත්කර්ෂවත් අන්දමින් පැවැත්විණි.
මහාවිහාරවංශික ශ්රී ලංකා අමරපුර මහා නිකායේ උත්තරීතර මහානායක අතිපූජ්ය කරගොඩ උයන්ගොඩ මෛත්රීමූර්ති මහානායක ස්වාමීන්ද්රයන් වහන්සේගේ ප්රධානත්වයෙන් පැවති මෙම පුණ්ය මහෝත්සවයේදී, මහා විහාරවංශික උඩරට අමරපුර මහා නිකායේ මහානායක පදවිය වෙනුවෙන් වූ ශ්රී සන්නස් පත්රය අග්රාමාත්ය ආචාර්ය හරිනි අමරසූරිය මහත්මිය විසින් අතිපූජ්ය නිකපොත චන්ද්රජෝති මහානාහිමිපාණන් වහන්සේ වෙත අතිශය ගෞරව පූර්වකව පිළිගන්වන ලදී. ත්රෛනිකායික මහා සංඝරත්නයේ උතුම් ආශිර්වාදය මැද පැවති මෙම ජාතික මහෝත්සවය සඳහා බුද්ධශාසන, ආගමික හා සංස්කෘතික කටයුතු අමාත්ය ආචාර්ය හිනිදුම සුනිල් සෙනෙවි, මහජන ආරක්ෂක හා පාර්ලිමේන්තු කටයුතු නියෝජ්ය අමාත්ය නීතිඥ සුනිල් වටගල යන මහත්වරුන් ඇතුළු මැතිඇමතිවරුන්, බෞද්ධ කටයුතු කොමසාරිස් ජනරාල් ඇතුළු රාජ්ය නිලධාරීන් මෙන්ම දායක දායිකාවන් විශාල පිරිසක් එක්ව සිටියහ.
