පසුගිය 2016 වසරේ කොළඹ තුන්මුල්ලේ පිහිටි එක්සත් ජාතීන්ගේ කාර්යාලය ඉදිරිපිට මාර්ග අවහිර කරමින් උද්ඝෝෂණය කිරීම තුළින් මහජන පීඩාවක් සිදු කිරීමේ චෝදනාව යටතේ ජාතික නිදහස් පෙරමුණේ නායක විමල් වීරවංශ මහතා ඇතුළු විත්තිකරුවන් හය දෙනෙකුට එරෙහිව පවරා ඇති නඩුවේ වැඩිදුර සාක්ෂි විභාගය එළැඹෙන ජූලි මස 13 වනදා දක්වා කල් තැබීමට කොළඹ ප්රධාන මහෙස්ත්රාත් අධිකරණය අද (18) නියෝග කළේය. මෙම නඩුව අද කොළඹ ප්රධාන මහේස්ත්රාත් අසංග එස්. බෝදරගම මහතා ඉදිරියේ කැඳවූ අවස්ථාවේදී, නඩුවට අදාළ සාක්ෂිකරුවන් අධිකරණයේ පෙනී නොසිටීම හේතුවෙන් මෙලෙස සාක්ෂි විභාගය කල් තැබීමට මහේස්ත්රාත්වරයා තීරණය කළේය.
2016 පෙබරවාරි 6 වැනිදා එවක එක්සත් ජාතීන්ගේ මානව හිමිකම් කොමසාරිස් සෙයිඩ් අල් හුසේන් කුමරු ලංකාවට පැමිණි අවස්ථාවේදී ඊට විරෝධය පළ කරමින්, මංමාවත් පනත සහ පොලිස් ආඥා පනත උල්ලංඝනය කරමින් මහජනතාවට දැඩි පීඩාවක් වන පරිදි කටයුතු කළ බවට චෝදනා කරමින් කුරුඳුවත්ත පොලිසිය විසින් මෙම නඩුව පවරා තිබේ. මෙම නඩුවේ සෙසු විත්තිකරුවන් ලෙස හිටපු පාර්ලිමේන්තු මන්ත්රීවරුන් වන ජයන්ත සමරවීර, වීරකුමාර දිසානායක, පියසිරි විජේනායක, මොහොමඩ් මුසම්මිල් සහ ප්රවීණ රංගන ශිල්පී රොජර් සෙනෙවිරත්න යන මහත්වරුන් නම් කර ඇත.
