ස්විට්සර්ලන්තයේ ජිනීවා නුවරදී පැවැත්වෙන 79 වන ලෝක සෞඛ්ය සමුළුවේ (World Health Assembly) ප්රධාන සැසිය අද (18) ඇමතීමට ශ්රී ලංකාවේ සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා සූදානමින් පසුවේ. පසුගිය මැයි 16 වැනිදා ආරම්භ වූ මෙම ජාත්යන්තර සමුළුව එළැඹෙන මැයි 22 වැනිදා දක්වා පැවැත්වීමට නියමිතය. මෙහි ඇති විශේෂත්වය වන්නේ, පසුගිය 2025 ඔක්තෝම්බර් මාසයේදී ලෝක සෞඛ්ය සංවිධානයේ (WHO) දකුණු සහ අග්නිදිග ආසියාතික කලාපීය සමුළුවේ සභාපතීත්වය සඳහා වෛද්ය නලින්ද ජයතිස්ස මහතා තේරී පත්වී තිබීමයි. ඒ අනුව, ඔහු මෙවර සමුළුව නියෝජනය කරන්නේ ශ්රී ලංකාවේ සෞඛ්ය අමාත්යවරයා ලෙස මෙන්ම එම කලාපීය සමුළුවේ නිල සභාපතිවරයා වශයෙන් ද වීම සුවිශේෂී කරුණකි.
මෙම ගෝලීය සමුළුවට සමගාමීව පැවැත්වෙන ප්රධාන සැසිවාර රැසකට එක්වන අමාත්යවරයා, මෙරට සෞඛ්ය ක්ෂේත්රයේ ප්රගතිය සහ අනාගත ඉලක්කයන් පිළිබඳව ලෝක අවධානය යොමු කිරීමට නියමිතය. එලෙසම, මෙම සංචාරය අතරතුර සමුළුවට සහභාගී වන භූතානය, තායිලන්තය, බංගලිදේශය ඇතුළු රටවල් රැසක සෞඛ්ය අමාත්යවරුන් සමඟ ද, “නිපොන් පදනම” (Nippon Foundation) ඇතුළු ජාත්යන්තර සංවිධාන කිහිපයක ප්රධානීන් සමඟ ද්විපාර්ශ්වික සාකච්ඡා පවත්වා මෙරට සෞඛ්ය ක්ෂේත්රයේ දියුණුව උදෙසා නව සබඳතා ඇති කරගැනීමට ද වෛද්ය නලින්ද ජයතිස්ස මහතා කටයුතු කරනු ඇත.
