සිංගප්පූරුවේ පැවැත්වෙන ‘Asia Tech 2026’ සමුළුවට සමගාමීව, ශ්රී ලංකාවේ ඩිජිටල් පරිවර්තන ක්රියාවලිය වඩාත් වේගවත් හා කාර්යක්ෂම කිරීම අරමුණු කරගනිමින් බිල් සහ මෙලින්ඩා ගේට්ස් පදනම (Gates Foundation) සමඟ විශේෂ ද්විපාර්ශ්වික සාකච්ඡාවක් සාර්ථකව පවත්වා තිබේ. ඩිජිටල් ආර්ථික නියෝජ්ය අමාත්ය එරංග වීරරත්න මහතාගේ ප්රධානත්වයෙන් යුත් ශ්රී ලංකා දූත පිරිසක් මෙම අවස්ථාවට එක් වූහ.
මෙහිදී ශ්රී ලංකාව කලාපය තුළ සියලු දෙනා ඇතුළත් කරගත් ඩිජිටල් පරිවර්තනයක් සඳහා ප්රායෝගිකව කැපවී ක්රියාකරන රටක් ලෙස ඇගයීමට ලක්විය. මෙම සාකච්ඡාවේ ප්රධාන අරමුණ වූයේ ශ්රී ලංකාවේ කෘත්රිම බුද්ධි (AI) උපායමාර්ගය සහ “පොදු යහපත සඳහා AI තාක්ෂණය” (AI for Public Good) යොදාගැනීමේ වැඩපිළිවෙළ උදෙසා තාක්ෂණික සහ උපදේශන සහයෝගීතාව ලබාගැනීමයි. මේ යටතේ ශ්රී ලංකාවේ කෙටුම්පත් කර ඇති AI ප්රතිපත්ති මාලාව ගේට්ස් පදනමේ සමාලෝචනයට ලක් කිරීමටත්, ඩිජිටල් රාජ්ය යටිතල පහසුකම් (DPI) ශක්තිමත් කිරීම සඳහා තාක්ෂණික සංවාදයක් ඇරඹීමටත් මෙහිදී එකඟතාව පළ විය.
තවද, කෘෂිකාර්මික ක්ෂේත්රය ඩිජිටල්කරණය කිරීමේ “IDAT 2” ව්යාපෘතියේ මීළඟ අදියර වඩාත් ගොවි-කේන්ද්රීය මුහුණුවරකින් ක්රියාත්මක කිරීමට තීරණය කෙරිණි. ඒ අනුව ගොවීන්ගේ ඵලදායිතාව සහ වෙළෙඳපොළ ප්රවේශය ඉහළ නැංවීම, දේශගුණික විපර්යාසයන්ට ඔරොත්තු දීමේ හැකියාව වර්ධනය කිරීම සහ AI තාක්ෂණය ඔස්සේ ගොවීන්ට අවශ්ය ඩිජිටල් උපදේශන සේවා සැපයීම කෙරෙහි මෙහිදී විශේෂ අවධානයක් යොමු විය.
මෙම ඩිජිටල් ගමන වඩාත් කඩිනම් කිරීම සඳහා සිංගප්පූරුවේ “AI Singapore” ආයතනය සමඟ එක්ව රාජ්ය අංශයේ AI භාවිතය වර්ධනය කිරීමටත්, ඉන්දියාවේ “EkStep” පද්ධතිය හරහා බහුභාෂා AI යටිතල පහසුකම් සංවර්ධනය කිරීමටත් සාකච්ඡා කෙරුණු අතර, ඩිජිටල් හැඳුනුම්පත් (Digital ID) ක්රියාවලීන් අධ්යයනය සඳහා ගොව්ටෙක් (GovTech) ශ්රී ලංකා ප්රධාන විධායක නිලධාරීවරයාට බැංගලෝරයේ විශේෂ චාරිකාවකට ද ආරාධනා ලැබිණි. මෙම සුවිශේෂී සාකච්ඡාව සඳහා ශ්රී ලංකා පාර්ශවයෙන් ඩිජිටල් ආර්ථික නියෝජ්ය අමාත්ය එරංග වීරරත්න සහ ගොව්ටෙක් ශ්රී ලංකා හි ප්රධාන විධායක නිලධාරී සංජය කරුණාසේන යන මහත්වරුන් සහභාගී වූ අතර, ගේට්ස් පදනම වෙනුවෙන් එහි ඉහළ නිලධාරියෙකු වන හරී මෙනන් (Hari Menon) මහතා ඇතුළු නියෝජිත කණ්ඩායම එක්ව සිටියහ.
