2026 යල කන්නයේ වගා කටයුතු සාර්ථක කර ගැනීම සඳහා තවදුරටත් අවශ්ය වන යූරියා පොහොර මෙට්රික්ටොන් 15,000ක් ගොවිජන සේවා කාරක සභා මඟින් කඩිනමින් මිල දී ගෙන ගොවීන් වෙත සැපයීම පිණිස කෘෂිකර්ම, පශු සම්පත්, ඉඩම් සහ වාරිමාර්ග අමාත්යවරයා ඉදිරිපත් කළ යෝජනාවට අමාත්ය මණ්ඩල අනුමැතිය හිමිව තිබේ.
මෙවර යල කන්නයට අදාළව නිකුත් වූ නිල වාර්තාවේ සාරාංශය මෙසේය:
වගා ඇස්තමේන්තු සහ පොහොර අවශ්යතාව:
2026 යල කන්නයේදී කුඹුරු ඉඩම් හෙක්ටයාර 550,000ක් වගා කරනු ඇතැයි මුලින් ඇස්තමේන්තු කර තිබුණ ද, වත්මන් තත්ත්වය අනුව එම ප්රමාණය හෙක්ටයාර 450,000ත් 500,000ත් අතර අගයක් ගනු ඇතැයි නැවත ඇස්තමේන්තු කර ඇත. ඒ සඳහා යූරියා පොහොර මෙට්රික්ටොන් 75,000ක් පමණ අවශ්ය වන බව ගණනය කර තිබේ. රට තුළ පැවති පොහොර සංචිතවලින් මේ වන විට මෙට්රික්ටොන් 48,297.87ක් ගොවිජන සේවා කාරක සභා මඟින් මිල දී ගෙන ගොවීන් වෙත බෙදා හරිමින් පවතී.
පොහොර මිටියක ස්ථාවර මිල:
2026 යල කන්නය සඳහා ස්ථාවර මිලකට පොහොර සැපයීම තහවුරු කිරීමේ අරමුණින්, කිලෝග්රෑම් 50ක යූරියා පොහොර මිටියක් රුපියල් 10,200/-ක සහන මිලකට ගොවීන් වෙත ගොවිජන සේවා මධ්යස්ථාන මඟින් ලබා දීම සඳහා පසුගිය අප්රේල් 06 වැනිදා පැවති අමාත්ය මණ්ඩල රැස්වීමේදී දැනටමත් අනුමැතිය ලබා දී ඇත.
අලුතින් මිලදී ගන්නා මෙම මෙට්රික්ටොන් 15,000ක සංචිතය ද එක්වීමත් සමඟ ඉදිරි යල කන්නයේ වගා කටයුතු සඳහා හිඟයකින් තොරව පොහොර සැපයීමට හැකිවනු ඇතැයි රජය අපේක්ෂා කරයි.
