මඩකළපුව දිස්ත්රික්කයේ ජනතාව මුහුණ දෙන යටිතල පහසුකම් ඌนතාවය, පානීය ජල හිඟය සහ කැළි කසළ ඇතුළු ප්රධාන ගැටලුවලට ඉදිරි අයවැය මඟින් විශේෂ අවධානයක් යොමු කරමින් ප්රතිපාදන වෙන් කිරීමට පියවර ගන්නා බව ජනාධිපති අනුර කුමාර දිසානායක මහතා ප්රකාශ කර තිබේ. ජනාධිපතිවරයාගේ ප්රධානත්වයෙන් අද (20) පෙරවරුවේ මඩකළපුව දිස්ත්රික් ලේකම් කාර්යාලයේදී පැවැති විශේෂ දිස්ත්රික් සම්බන්ධීකරණ කමිටු රැස්වීමේදී මෙම තීරණවලට එළඹ ඇත.
මෙහිදී අදහස් දක්වමින් ජනාධිපතිවරයා කියා සිටියේ මඩකළපුව දිස්ත්රික්කයේ පානීය ජල, වාරි සහ කර්මාන්ත කටයුතු සඳහා අවශ්ය ජල සම්පාදන ව්යාපෘති පිළිබඳ මහජන නියෝජිතයන් සහ ජනතාව එක්ව සාකච්ඡා කර වාර්තාවක් ලබා දෙන ලෙසත්, ඒ පිළිබඳ සාකච්ඡා කිරීමට ජල සම්පාදන මණ්ඩලයේ සභාපතිවරයා ඇතුළු නිලධාරීන් කඩිනමින් ප්රදේශයට එවන බවත්ය. එමෙන්ම ජල සම්පාදන මණ්ඩලය විසින් මෙතෙක් සැලසුම් කර ඇති සියලු ව්යාපෘතිවලට අවශ්ය ප්රතිපාදන වෙන් කරන බව පැවසූ ජනාධිපතිවරයා, ප්රධාන ව්යාපෘති ක්රියාත්මක වන තෙක් ජනතාවගේ පානීය ජල ගැටලුව විසඳීමට කඩිනම් තාවකාලික පියවර ගන්නා ලෙස ද නිලධාරීන්ට උපදෙස් ලබා දුන්නේය.
මීට අමතරව දිස්ත්රික්කයේ මාර්ග සහ පාලම් ඉදිකිරීම් මේ වසරේදීම ආරම්භ කරන ලෙසත්, මයිලත්තමඩු-මාදවනෙයි තෘණ භූමියේ කිරි ගොවීන්ගේ ගැටලුව, ඉඩම් හා වනජීවී ප්රශ්න, වාලච්චේන වරාය පූර්ණ ලෙස සංවර්ධනය කිරීම සහ ඒ සඳහා ප්රදීපාගාරයක ඇති අවශ්යතාවය පිළිබඳව ද මෙහිදී දීර්ඝ ලෙස සාකච්ඡා කෙරිණි. අලි-මිනිස් ගැටුම, ගංවතුර පාලනය, සෞඛ්ය පහසුකම් වැඩිදියුණු කිරීම මෙන්ම ‘දිට්වා’ සුළි කුණාටුවෙන් විනාශ වූ වගා බිම් සහ නිවාස සඳහා වන්දි ගෙවීමේ කටයුතු කඩිනම් කිරීම පිළිබඳව ද මෙහිදී අවධානය යොමු විය.
