වාහන මත පනවා ඇති තීරු බද්දට 50%ක අධිභාරයක් (Surcharge) පැනවීමට පෙර මෙරටට වාහන 4,000ක් ආනයනය කිරීම සඳහා ණයවර ලිපි (LC) නිකුත් කර ඇතැයි විපක්ෂය නඟන චෝදනාව සම්පූර්ණයෙන්ම අසත්ය බව මුදල් හා ක්රමසම්පාදන නියෝජ්ය අමාත්ය ආචාර්ය අනිල් ජයන්ත ප්රනාන්දු මහතා පාර්ලිමේන්තුවේදී පැවසීය.
නියෝජ්ය අමාත්යවරයා පැහැදිලි කළේ පසුගිය 15 වැනිදා වන විට මෙරටට ගෙන්වා තිබුණේ වාහන 1,782ක් පමණක් බවයි. එමෙන්ම ඒ සඳහා නිකුත් කර ඇති ණයවර ලිපි (LC) සංඛ්යාව 380ක් පමණක් වන අතර, ඒ වෙනුවෙන් වැය වී ඇත්තේ ඇමෙරිකානු ඩොලර් මිලියන 23.71ක් වැනි මුදලක් පමණක් බව ද ඔහු අවධාරණය කළේය. පවතින තත්ත්වය හමුවේ රට ගැන සිතා තම වාහන ඇණවුම් ගෙන්වීම මඳක් ප්රමාද කරන ලෙස ඔහු වාහන ආනයනකරුවන්ගෙන් සහ ජනතාවගෙන් ඉල්ලා සිටියේය.
රටේ ආර්ථික තත්ත්වය පිළිබඳව ද අදහස් දැක්වූ නියෝජ්ය අමාත්යවරයා, 2025 වසරේදී ශ්රී ලංකාව 5%ක ආර්ථික වර්ධනයක් අත්පත් කරගත් බවත්, ඒකපුද්ගල දළ දේශීය නිෂ්පාදිතය (GDP per capita) ඩොලර් 5,000 සීමාව ඉක්මවා ගිය බවත් සඳහන් කළේය. විපක්ෂය විසින් රාජ්ය ණය පිළිබඳව වැරදි දත්ත ඉදිරිපත් කරමින් ජනතාව නොමඟ යවන බවත්, දේශීය භාණ්ඩාගාර බිල්පත් සහ බැඳුම්කර හරහා ලබා ගන්නා ණය රජය විසින් සීමා කර ඇති බවත් පැවසූ ඔහු, 2026 වසරේදී රාජ්ය ණය කළමනාකරණය 94.5% දක්වා ස්ථාවර මට්ටමකට ගෙන ඒමට සැලසුම් කර ඇති බව ද ප්රකාශ කළේය.
