ගාලුමුවදොර පිටියේ පැවති සාමකාමී උද්ඝෝෂණයකට පහරදීමේ සිද්ධියට අදාළව හිටපු පොලිස්පති දේශබන්දු තෙන්නකෝන් මහතා ඇතුළු සැකකරුවන් 37 දෙනෙකුට එරෙහිව පවරා ඇති නඩුව ලබන නොවැම්බර් මස 4 වැනිදා යළි කැඳවන ලෙස කොටුව මහේස්ත්රාත් පසන් අමරසේන මහතා ඊයේ (20) නියෝග කළේය.
මෙම නඩුව කැඳවූ අවස්ථාවේදී අපරාධ පරීක්ෂණ දෙපාර්තමේන්තුව (CID) අධිකරණයට දන්වා සිටියේ, සිද්ධියෙන් තුවාල ලැබූවන්ට අදාළ වෛද්ය වාර්තා 39ක් මේ වන විට ලැබී ඇති අතර, තවත් වෛද්ය වාර්තා 3ක් ලැබීමට නියමිත බවයි. සිද්ධියට සම්බන්ධ තුවාලකරුවන් 56 දෙනෙකු සඳහා අධිකරණ වෛද්ය පෝරම පුරවා ඇති බවත්, සියලු වෛද්ය වාර්තා ලැබුණු වහාම නීතිපතිවරයා වෙත යොමු කරන බවත් CID නිලධාරීන් අධිකරණය හමුවේ වැඩිදුරටත් කියා සිටියහ.
මෙම සිද්ධියට අදාළ නඩු ගොනුව නීතිපති උපදෙස් සඳහා පසුගිය වසරේ සැප්තැම්බර් 9 වැනිදා නීතිපතිවරයා වෙත යොමු කර තිබේ. රජයේ දේපළවලට හානි කිරීම සම්බන්ධයෙන් සැකකරුවන්ට එරෙහිව පොදු දේපළ පනත ඇතුළු නීති යටතේ චෝදනා ගොනු කර ඇත.
නඩුව කැඳවූ අවස්ථාවේදී හිටපු පොලිස්පති දේශබන්දු තෙන්නකෝන්, හිටපු ඇමැති ජොන්ස්ටන් ප්රනාන්දු සහ හිටපු පාර්ලිමේන්තු මන්ත්රී මිලාන් ජයතිලක ඇතුළු සැකකරුවන් 35 දෙනෙකු අධිකරණයේ පෙනී සිටියහ.
