නිරිත දිග මෝසම් තත්ත්වය දිවයින පුරා ක්රමයෙන් ස්ථාපිත වෙමින් පවතින බව කාලගුණවිද්යා දෙපාර්තමේන්තුව අද (21) නිල වශයෙන් නිවේදනය කළේය. මේ හේතුවෙන් ඉදිරි දින කිහිපය තුළ දිවයිනේ ප්රදේශ රැසකට මිලිමීටර් 100 ඉක්මවූ තද වැසි මෙන්ම පැයට කිලෝමීටර් 50ත් 60ත් අතර ප්රහාරාත්මක තද සුළං ද ඇතිවිය හැකි බැවින් මහජනතාව දැඩි අවධානයෙන් පසුවිය යුතු බව එම දෙපාර්තමේන්තුව පවසයි.
විශේෂයෙන්ම බස්නාහිර, සබරගමුව සහ වයඹ පළාත්වලටත්, ගාල්ල, මාතර, මහනුවර සහ නුවරඑළිය යන දිස්ත්රික්කවලටත් විටින් විට ගිගුරුම් සහිත වැසි ඇතිවිය හැකි අතර සමහර ස්ථානවලට මෝසම් කාලගුණයත් සමඟ දැඩි වර්ෂාපතනයක් බලාපොරොත්තු විය හැක. මීට අමතරව මධ්යම කඳුකරයේ බටහිර බෑවුම් ප්රදේශවල, උතුරු, උතුරු-මැද සහ වයඹ පළාත්වල මෙන්ම හම්බන්තොට සහ ත්රිකුණාමලය දිස්ත්රික්කවල ද සුළගේ වේගය වරින් වර ඉහළ යා හැකි බව වාර්තා වේ. දිවයින වටා වන මුහුදු ප්රදේශ ද රළු විය හැකි බැවින් ධීවර සහ නාවික ප්රජාවට අවධානයෙන් කටයුතු කරන ලෙස උපදෙස් දෙන කාලගුණවිද්යා දෙපාර්තමේන්තුව, අකුණු අනතුරු සහ ගස් කඩා වැටීම්වලින් සිදුවන හානි අවම කරගැනීමට අවශ්ය පූර්ව ආරක්ෂිත පියවර ගන්නා ලෙස මහජනතාවගෙන් කාරුණිකව ඉල්ලා සිටියි.
