එක්සත් රාජධානියේ නිල සංචාරයක නිරත වෙමින් සිටින අග්රාමාත්ය ආචාර්ය හරිනි අමරසූරිය මහත්මිය ලන්ඩන් නුවරදී එරට වෙසෙන ශ්රී ලාංකික ප්රජාව හමුවී ඉතා සුහදශීලී සාකච්ඡාවක නිරත වූවාය. සිංහල, දෙමළ සහ මුස්ලිම් ඇතුළු සියලුම ජනකොටස් නියෝජනය කරමින් 1,000කට ආසන්න ශ්රී ලාංකිකයින් පිරිසක් මෙම සුවිශේෂී අවස්ථාවට එක්ව සිටියහ.
මෙහිදී අදහස් දැක්වූ අග්රාමාත්යවරිය කියා සිටියේ, විවිධ ස්වභාවික ආපදා සහ ජාත්යන්තර මට්ටමේ අර්බුද මධ්යයේ වුවද රටේ ආර්ථිකය ස්ථාවර මට්ටමකට ගෙන එමින් ජනතාවට සහන සැලසීමට වත්මන් රජය සමත්ව ඇති බවයි. එමෙන්ම, ශ්රී ලංකාවේ දේශපාලන සංස්කෘතිය යළි කිසිසේත් හැරවිය නොහැකි සුබදායී සහ යහපත් පරිවර්තනයකට ලක්ව ඇති බව ද ඇය අවධාරණය කළාය. රැස්වීමට සහභාගී වූ අමාත්ය සරෝජා සාවිත්රි පෝල් රාජ් මහත්මිය ප්රකාශ කළේ, සියලු ජාතීන්ට සමානව සලකන සහ රටේ ආර්ථික සංවර්ධනයේ ප්රතිලාභ සෑම පුරවැසියෙකුටම සමසේ හිමිවන පාලන ක්රමයක් රට තුළ ස්ථාපිත කර ඇති බවයි.
සාම්ප්රදායික දේශපාලන රැස්වීම් රටාවෙන් බැහැරව සංවිධානය කර තිබූ මෙම හමුවේදී, පැමිණ සිටි ලාංකිකයින්ට අග්රාමාත්යවරිය සහ අමාත්යවරිය වෙත සෘජුවම ප්රශ්න යොමු කරමින් අදහස් දැක්වීමට විවෘත අවස්ථාවක් හිමිවිය. කිසිදු මහජන මුදලක් භාවිත නොකර, රාත්රී ආහාරය ඇතුළුව උත්සවයේ සියලු වියදම් සහභාගී වූවන් විසින්ම දරා ගනිමින් මෙම හමුව සංවිධානය කර තිබීම විශේෂත්වයකි. මෙම අවස්ථාවට එක්සත් රාජධානියේ ශ්රී ලංකා මහ කොමසාරිස් නිමල් සේනාධීර මහතා ද එක්ව සිටියේය.
