තුර්කියේ ප්රධාන විපක්ෂය වන ජනරජ මහජන පක්ෂයේ (CHP) වත්මන් නායක ඔස්ගුර් ඔසෙල් මහතා (Ozgur Ozel) වහාම ක්රියාත්මක වන පරිදි එම ධුරයෙන් ඉවත් කිරීමට තුර්කි අභියාචනාධිකරණය අද (21) පියවර ගත්තේය. ඔස්ගුර් ඔසෙල් පක්ෂ සභාපතිත්වයට පත්වූ 2023 වසරේ පැවැති පක්ෂ මහා සමුළුවේ (2023 Congress) ඡන්ද විමසීමේදී බරපතල අක්රමිකතා සිදුව ඇති බව ප්රකාශ කරමින් එම සමුළු ප්රතිඵල මුළුමනින්ම අවලංගු කිරීමට අධිකරණය තීන්දු කර තිබේ. මෙම ඓතිහාසික නියෝගයත් සමඟ පක්ෂයේ හිටපු සභාපති කෙමාල් කිලිච්දාරොග්ලු (Kemal Kilicdaroglu) නැවතත් පක්ෂ නායකත්වයට පත්කළ යුතු බවට ද අධිකරණය නියෝග කර ඇත. මෙම අධිකරණ තීන්දුව තුර්කි මූල්ය වෙළඳපොළට ද දැඩි බලපෑමක් එල්ල කර ඇති අතර, වසර විසි ගණනකට වඩා වැඩි කාලයක් එරට පාලනය කරන ජනාධිපති රෙසෙප් තායිප් එර්ඩොගන්ගේ (Tayyip Erdogan) දේශපාලන බල අධිකාරියට අභියෝග කිරීමට සිටි ප්රධානතම දේශපාලන කණ්ඩායම මේ වන විට දැඩි අභ්යන්තර අර්බුදයකට හා බෙදීමකට ලක්ව තිබේ. තුර්කියේ වඩාත්ම ජනප්රිය විපක්ෂ දේශපාලනඥයෙකු මෙන්ම ඉස්තාන්බුල් නුවර නගරාධිපතිවරයා ද වන ඒක්රෙම් ඉමාමොග්ලු (Ekrem Imamoglu) ඇතුළු විපක්ෂයේ ප්රධානීන් සිය ගණනක් දූෂණ සහ වෙනත් චෝදනා මත 2024 වසරේ සිට අඛණ්ඩව අත්අඩංගුවට පත්වෙමින් පවතින පසුබිමක මෙම තීන්දුව ප්රකාශයට පත් විය. විපක්ෂය මෙම චෝදනා දේශපාලන පළිගැනීම් ලෙස ප්රතික්ෂේප කරන අතර, අධිකරණ තීන්දුවෙන් පසු ඉදිරි ක්රියාමාර්ග ගැනීම සඳහා ඔස්ගුර් ඔසෙල් ඇතුළු පක්ෂයේ ඉහළ පාලනාධිකාරිය මේ වන විට හදිසි මණ්ඩල රැස්වීමක් කැඳවා තිබේ.
