රාජ්ය නොවන සංවිධානයක නියෝජිතයෙකු ලෙස පෙනී සිටිමින් කැනඩාවේ රැකියා ලබාදෙන බව පවසා රුපියල් ලක්ෂ 40කට අධික මුදලක් වංචා කළ පුද්ගලයෙකු ශ්රී ලංකා විදේශ සේවා නියුක්ති කාර්යාංශයේ විශේෂ විමර්ශන නිලධාරීන් විසින් අත්අඩංගුවට ගෙන තිබේ.
නැගෙනහිර පළාතේ තරුණ තරුණියන් රවටමින් කැනඩාවේ සුපිරි වෙළඳසැල්වල රැකියා ලබාදෙන බව පවසා සැකකරු විසින් මුදල් වංචා කරන බවට විදේශ සේවා නියුක්ති කාර්යාංශය වෙත පැමිණිලි 7ක් ලැබී තිබුණි. ඒ අනුව විමර්ශන ආරම්භ කළ නිලධාරීන් සැකකරු අත්අඩංගුවට ගැනීමට කිහිපවරක් උත්සාහ කළ ද ඔහු විමර්ශන මගහරිමින් සැඟව සිට ඇත. පසුව පොලිස් විශේෂ කාර්යාංශයේ (SBI) නිලධාරීන් හා එක්ව සිදුකළ වැටලීමකදී කුච්චවේලි ප්රදේශයේ නිවසක සැඟව සිටි මෙම සැකකරු අත්අඩංගුවට ගැනීමට විමර්ශන නිලධාරීන්ට හැකි වී තිබේ.
අත්අඩංගුවට පත් 28 හැවිරිදි කුච්චවේලි ප්රදේශයේ පදිංචි මෙම සැකකරුට විරුද්ධව මීගමුව, මඩකලපුව සහ අවිස්සාවේල්ල යන අධිකරණවල ද දැනටමත් නඩු පවතින බව වාර්තා වෙයි. විදේශ සේවා නියੁක්ති කාර්යාංශය සඳහන් කරන්නේ මොහුට එරෙහිව තවදුරටත් පැමිණිලි ලැබෙමින් පවතින අතර, සැකකරු විසින් මෙතෙක් වංචා කර ඇති සමස්ත මුදල රුපියල් කෝටියකට අධික බව සිදුකළ මූලික විමර්ශනවලදී අනාවරණය වී ඇති බවයි.
