අමෙරිකානු ආරක්ෂක දෙපාර්තමේන්තුව (පෙන්ටගනය) විසින් පිටසක්වල ජීවීන් සහ හඳුනානොගත් පියාසර වස්තූන් (UFO) සම්බන්ධයෙන් මෙතෙක් අතිශය රහසිගතව තබාගෙන සිටි නිල ලේඛනවල දෙවන කොටස මහජනතාව සඳහා ප්රසිද්ධියට පත් කර තිබේ. ආරක්ෂක අංශ විසින් නිල වශයෙන් “හඳුනානොගත් විෂම සංසිද්ධි” (Unidentified Anomalous Phenomena – UAP) ලෙස හඳුන්වනු ලබන මෙම ලේඛන එකතුව, දීර්ඝ කාලයක් තිස්සේ ලෝකය පුරා දැඩි කුතුහලයක් සහ විවිධ මතභේද ඇති කිරීමට හේතු වූවකි.
මෙවර නිකුත් කර ඇති සමස්ත ලේඛන 222 අතරින් වඩාත්ම අවධානයට ලක්ව ඇත්තේ 1948 සිට 1950 දක්වා කාලය තුළ නිව් මෙක්සිකෝහි පිහිටි ‘සැන්ඩියා’ (Sandia) නම් අතිශය රහසිගත අමෙරිකානු යුද කඳවුර ආශ්රිතව සිදුවූ විමර්ශනවලට අදාළ පිටු 116ක විශේෂ වාර්තාවයි. එම ආරක්ෂිත කලාපයේ අහසේ අද්භූත කොළ පැහැති ආලෝක ගෝල (Green Orbs), තැටි හැඩැති වස්තූන් (Discs) සහ ගිනි බෝල (Fireballs) දර්ශනය වූ සුවිශේෂී අවස්ථා 209ක් පිළිබඳ සවිස්තරාත්මක සාක්ෂි සහ ප්රකාශ රැසක් මෙම ගොනුවලට ඇතුළත් කර ඇත.
අමෙරිකානු ජනාධිපති ඩොනල්ඩ් ට්රම්ප්ගේ විශේෂ නියෝගයකට අනුව මෙහි පළමු ලේඛන සමූහය පසුගිය මැයි 8 වැනිදා ප්රසිද්ධියට පත් කෙරුණු අතර, 1970 දශකයේ අගභාගයේ සිට වරින් වර සිදුවූ UFO රාජ්ය වාර්තා හෙළිදරව් කිරීමේ ක්රියාවලිය යටතේ මෙලෙස තොරතුරු ජනගත කිරීමට පියවර ගත් නවතම ජනාධිපතිවරයා වන්නේ ද ඔහුය. මේ පිළිබඳව අදහස් දක්වමින් අමෙරිකානු ආරක්ෂක ලේකම් පීට් හෙග්සෙත් (Pete Hegseth) සිය නිල ප්රකාශයේ සඳහන් කර ඇත්තේ, මෙම අභිරහස් සංසිද්ධි පිළිබඳව තවදුරටත් සඟවා තැබීමකින් තොරව අමෙරිකානු ජනතාවට තමන්ගේම ඇසින් දැක බලා තීරණ ගැනීමට දැන් කාලය පැමිණ ඇති බවයි.
