මැදපෙරදිග කලාපයේ පවතින ඉරාන ගැටුම්කාරී තත්ත්වය හේතුවෙන් ලෝක වෙළෙඳපොළේ බොරතෙල් මිල සීඝ්රයෙන් ඉහළ යාම මත, ඉන්දියාවේ ඉන්ධන මිල මේ මස තුළ තෙවන වරටත් ඉහළ දැමීමට එරට රජයේ ඉන්ධන සිල්ලර සමාගම් පියවර ගෙන තිබේ. ලෝක වෙළෙඳපොළේ පවතින ඉහළ බොරතෙල් මිල නිසා සිදුවන පාඩුව පියවා ගැනීම සඳහා ඉන්දීය රජය ගත් මෙම තීරණයට අනුව, මෙවර පෙට්රල් සහ ඩීසල් ලීටරයක මිල ඉන්දීය රුපියලකට වඩා අඩු අගයකින් ඉහළ දමා ඇත. ඒ අනුව නවදිල්ලි අගනුවර පෙට්රල් ලීටරයක මිල ශත 87 කින් ඉහළ දමා ඇති අතර එහි නව මිල රුපියල් 99.51 ක් ලෙස සටහන් වේ. එමෙන්ම ඩීසල් ලීටරයක මිල ශත 91 කින් ඉහළ දමා ඇති අතර එහි නව මිල රුපියල් 92.49 ක් දක්වා ඉහළ ගොස් තිබේ.
මීට දින කිහිපයකට පෙර ද ඉන්දියාවේ ඉන්ධන මිල ශත 90 කින් පමණ ඉහළ දැමුණු අතර, බටහිර ආසියානු කලාපයේ පවතින ගැටුම් සහ හෝමුස් සමුද්ර සන්ධිය ආශ්රිතව මතුව ඇති තෙල් සැපයුම් පිළිබඳ ගැටලු හේතුවෙන් මීට පෙර එක් වරම ඉන්ධන මිල රුපියල් 3 කින් ඉහළ දැමීමට ද කටයුතු කෙරුණි. 2022 අප්රේල් මාසයේ සිට ඉන්දියාවේ සිල්ලර ඉන්ධන මිල ගණන් ස්ථාවරව පැවති අතර, 2024 මාර්තු මාසයේදී පමණක් රුපියල් 2 ක එක්දින මිල අඩු කිරීමක් සිදුවිය. රුසියානු-යුක්රේන යුද්ධයෙන් පසු ලෝක වෙළෙඳපොළේ ඇති වූ අස්ථාවරත්වයෙන් පාරිභෝගිකයන් ආරක්ෂා කිරීම සඳහා ඉන්දියන් ඔයිල් (IOC), භාරත් පෙට්රෝලියම් (BPCL) සහ හින්දුස්ථාන් පෙට්රෝලියම් (HPCL) යන රාජ්ය සමාගම් දෛනික මිල සංශෝධනය නතර කර තිබුණ ද, වත්මන් මැදපෙරදිග අර්බුදය හමුවේ බොරතෙල් මිල නැවතත් දරුණු ලෙස ඉහළ ගොස් ඇත. පසුගිය පෙබරවාරි මාසයේදී බැරලයක් ඩොලර් 69 ක් වූ ඉන්දියාවේ බොරතෙල් මිල මේ වන විට ඩොලර් 113 සිට 114 දක්වා ඉහළ ගොස් තිබේ. ඉන්දියාව තමන්ට අවශ්ය බොරතෙල් ප්රමාණයෙන් සියයට 90 කට ආසන්න ප්රමාණයක් විදේශයන්ගෙන් ආනයනය කරන බැවින්, ජාත්යන්තර බලශක්ති වෙළෙඳපොළේ සිදුවන මෙම උච්චාවචනයන් එරට දේශීය ඉන්ධන මිල කෙරෙහි ඍජුවම බලපා ඇත.
