දිට්වා ව්යසනය හේතුවෙන් උඩරට ප්රධාන දුම්රිය මාර්ගයේ පේරාදෙණිය සිට බදුල්ල දක්වා සිදුවූ හානි යථා තත්ත්වයට පත් කිරීමේ කටයුතු මේ වන විට කඩිනමින් ක්රියාත්මක වේ. මෙම ව්යසනය නිසා නායයෑම්, පස් සෝදා යෑම්, ගස් හා ගල් පෙරළීම් මෙන්ම පාලම් හා බෝක්කු හානිවීම් ඇතුළු ස්ථාන 126ක හානි වාර්තා වී තිබුණි.
දුම්රිය දෙපාර්තමේන්තුවේ සේවකයින්, ත්රිවිධ හමුදාව සහ ප්රදේශවාසීන්ගේ සහයෝගයෙන් සුළු හානි බොහොමයක් මේ වන විටත් අලුත්වැඩියා කර ඇති අතර, බරපතළ හානි සිදුවූ ස්ථාන සඳහා ජාතික ගොඩනැගිලි පර්යේෂණ ආයතනයේ (NBRI) උපදෙස් මත ඉංජිනේරු සැලසුම් සකස් කෙරේ. සැලසුම් අවසන් වූ ස්ථානවල ප්රතිසංස්කරණ කටයුතු RLVMMP ව්යාපෘතිය යටතේ පෞද්ගලික ඉදිකිරීම් ආයතන විසින් සිදුකරනු ලබයි.
ප්රගති වාර්තා අනුව මේ වන විට පේරාදෙණිය සිට ගම්පොල දක්වා දුම්රිය මාර්ගය සම්පූර්ණයෙන්ම යථා තත්ත්වයට පත් කර ඇත. ගම්පොල සිට නාවලපිටිය දක්වා හානි වූ ස්ථාන 13ක් යථා තත්ත්වයට පත් කෙරෙමින් පවතින අතර, නාවලපිටිය සිට කොටගල දක්වා සීමිත දුම්රිය ධාවනයක් දැනටමත් ආරම්භ කර තිබේ. කොටගල සිට නානුඔය අතර ප්රධාන හානි 6ක් පවතින අතර, නානුඔය සිට අඹේවෙල දක්වා ඉතිරිව ඇති එකම හානිය ප්රතිසංස්කරණය කිරීමේ කටයුතු මේ වන විට 70%ක ප්රගතියක පවතී.
එම කටයුතු අවසන් කිරීමෙන් පසු බදුල්ල සිට නානුඔය දක්වා දුම්රිය ධාවනය නැවත ආරම්භ කිරීමට හැකි වනු ඇති අතර, ජූනි මස අවසන් වන විට එම අරමුණ ඉටු කර ගැනීමට දුම්රිය බලධාරීන් අපේක්ෂා කරයි. අයහපත් කාලගුණය සහ ප්රවාහන දුෂ්කරතා මධ්යයේ වුවද, ජනතාවට නැවත සාමාන්ය ප්රවාහන සේවාව ලබාදීම සඳහා උපරිම කැපවීමෙන් කටයුතු කරන බව දුම්රිය දෙපාර්තමේන්තුව වැඩිදුරටත් අවධාරණය කරයි.
