නුවරඑළිය, හැටන් දික්ඔය ප්රදේශයේ වෙළඳසැලක් තුළදී අඹුසැමි යුවලක් තියුණු ආයුධවලින් කපා සාහසික ලෙස ඝාතනය කර, පවුම් 18ක ස්වර්ණාභරණ කොල්ලකෑමේ සිද්ධිය සම්බන්ධයෙන් අත්අඩංගුවට ගත් ප්රධාන සැකකරු අධිකරණ වෛද්ය වාර්තාවක් ලබාගැනීම සඳහා දික්ඔය මූලික රෝහලේ අධිකරණ වෛද්ය නිලධාරියා (JMO) වෙත ඉදිරිපත් කර ඇති බව පොලිසිය පවසයි. හැටන් සහ බගවන්තලාව පොලිස් කොට්ඨාසවල නිලධාරීන් එක්ව ඊයේ (23) සිදුකළ ඒකාබද්ධ විශේෂ මෙහෙයුමකදී මෙම සැකකරු කොටුකර ගැනීමට සමත්වූ අතර, ඔහුව හැටන් මහේස්ත්රාත් අධිකරණය වෙත ඉදිරිපත් කිරීමට ප්රථම මෙලෙස වෛද්ය පරීක්ෂණයකට ලක් කිරීමට පියවර ගෙන තිබේ.
පොලිස් විමර්ශනවලට අනුව, අත්අඩංගුවට ගන්නා අවස්ථාවේදී මෙම සැකකරු බගවන්තලාව ප්රදේශයේ වතුයායක පිහිටි ඔහුගේ බිරිඳගේ සහෝදරයාගේ නිවසේ රහසිගතව සැඟව සිට ඇත. සිද්ධියෙන් පසු සැකකරුගේ ඡායාරූප මාධ්ය සහ සමාජ මාධ්ය ජාලා ඔස්සේ වේගයෙන් ප්රසිද්ධ වීම හේතුවෙන්, කොල්ලකන ලද රන් භාණ්ඩ කිසිදු ස්ථානයකට උකස් කිරීමට හෝ විකිණීමට සැකකරුට නොහැකි වී තිබේ. ඒ අනුව, අපරාධයට ලක්වූවන්ගෙන් පැහැරගත් රන් ආභරණ තොගය මුළුමනින්ම සොයාගෙන නඩු භාණ්ඩ ලෙස පොලිස් භාරයට ගැනීමට හැටන් පොලිස් අපරාධ විමර්ශන අංශය සමත්ව ඇත.
මෙම සිද්ධියට සෘජුවම සම්බන්ධ සැකකරු සහ ඔහුගේ බිරිඳ යන දෙදෙනාම ඉදිරි පැය කිහිපය තුළ හැටන් මහේස්ත්රාත් අධිකරණය වෙත ඉදිරිපත් කිරීමට නියමිතය. එහිදී අපරාධය පිළිබඳව තවදුරටත් පුළුල් ලෙස ප්රශ්න කිරීම සහ ඉදිරි විමර්ශන කටයුතු පහසු කරගැනීම උදෙසා සැකකරුවන් වෙනුවෙන් දින කිහිපයක රැඳවුම් නියෝග (Detention Orders) ලබාගැනීමට පොලිසිය අපේක්ෂා කරයි.
මේ අතර, සාහසික ලෙස ඝාතනයට ලක්වූ අහිංසක අඹුසැමි යුවළගේ අවසන් කටයුතු අද (24) පස්වරුවේ දික්ඔය, දරාවල පොදු සුසාන භූමියේදී සිදුකෙරිණි. ප්රදේශයේ තරුණ මහලු, ආගමික භේදයකින් තොරව විශාල ජනකායකගේ සහ කඳුළු සලන ප්රදේශවාසීන්ගේ දැඩි සෝකය මැද දේහයන් පිළිබඳ අවසන් කටයුතු සිදුකළ අතර, හැටන් මූලස්ථාන පොලිසිය සිද්ධිය සම්බන්ධයෙන් වැඩිදුර පරීක්ෂණ පවත්වයි.
