මධ්යම සහ දකුණු පළාත්වලින් වාර්තා වී ඇති වෛරස් මෙනින්ජයිටිස් රෝගී තත්ත්වය පිළිබඳ වැඩිදුර නිරීක්ෂණ කටයුතු සිදු කිරීමට සහ රෝගය පැතිර යන ආකාරය හඳුනා ගැනීමට වෛරසවේදීන් සහ වසංගත රෝග විද්යාඥයින්ගෙන් සමන්විත විශේෂ කණ්ඩායමක් පත් කිරීමට සෞඛ්ය අමාත්යාංශය පියවර ගෙන තිබෙනවා. සෞඛ්ය නියෝජ්ය අමාත්ය වෛද්ය හංසක විජේමුණි මහතා පවසන්නේ රෝගය පැතිර යන ආකාරය සමාලෝචනය කර ඉදිරි ක්රියාමාර්ග නිර්දේශ කරන බවයි.
මෙම රෝගය මුඛ මාර්ගයෙන්, දූෂිත ජලයෙන් හෝ ආහාරවලින් බෝවිය හැකි බවට සැක කෙරෙන නමුත්, රෝගය සම්ප්රේෂණය වන නිශ්චිත ආකාරය තහවුරු කර ගැනීමට වැඩිදුර නිරීක්ෂණ අවශ්ය බව නියෝජ්ය අමාත්යවරයා වැඩිදුරටත් සඳහන් කළා. මේ වන විට නුවරඑළිය, දියතලාව, මහනුවර රෝහල, වැලිමඩ සහ රිකිල්ලගස්කඩ යන ප්රදේශවලින් රෝගීන් වාර්තා වී තිබෙනවා. දියතලාවෙන් රෝගීන් 28ක්, වැලිමඩින් 13ක් සහ රිකිල්ලගස්කඩින් 25ක් ලෙස රෝගීන් වාර්තා වී ඇති බව දත්ත පෙන්වා දෙනවා.
ප්රධාන වසංගත රෝග විශේෂඥ වෛද්ය පාලිත කරුණාපේම මහතා මහජනතාවගෙන් ඉල්ලා සිටින්නේ පවතින වැසි සහිත කාලගුණික තත්ත්වය සහ ඉදිරියේදී පැවැත්වෙන වෙසක් උත්සවය හා දන්සල් හේතුවෙන් රෝගය තවදුරටත් පැතිර යාමේ අවදානමක් ඇති බැවින් දැඩි ලෙස විමසිලිමත් වන ලෙසයි. අධික උණ, ඔක්කාරය, ක්ලාන්තය සහ හිසරදය මෙම රෝගයේ මූලික රෝග ලක්ෂණ වේ. නිසි ප්රතිකාර ලබාගන්නේ නම් දින 5 සිට 7 දක්වා කාලයකදී රෝගීන්ට සුවය ලැබිය හැකි බව වෛද්යවරුන් පවසයි. දූෂිත ජලය, ආහාර සහ ආසාදිත පුද්ගලයින් සමඟ සෘජු සම්බන්ධතා පැවැත්වීමෙන් රෝගය බෝවිය හැකි අතර, නිසි සෞඛ්ය පුරුදු අනුගමනය කිරීමෙන් මෙම ආසාදනය වළක්වා ගත හැකි බව සෞඛ්ය අංශ අවධාරණය කරනවා.
