නැගෙනහිර පළාතේ ඉඩම් ආරක්ෂා කර ගැනීම වෙනුවෙන් නියෝජ්ය පොලිස්පතිවරයාගේ ප්රධානත්වයෙන් විශේෂ කමිටුවක් පත් කරන බවත්, දේශපාලන බලය භාවිත කරමින් ඉඩම් අල්ලා ගැනීමට තවදුරටත් ඉඩ නොදෙන බවත් ජනාධිපති අනුර කුමාර දිසානායක මහතා පවසනවා. අම්පාර දිස්ත්රික් විශේෂ සම්බන්ධීකරණ කමිටු රැස්වීමට එක්වෙමින් ජනාධිපතිවරයා මේ බව අවධාරණය කළා.
පරිපාලන ව්යූහයන් ජාතීන් අනුව නොව, භූමියේ විශාලත්වය හා ජනගහනය වැනි පොදු නිර්ණායක මත පදනම්ව සකස් විය යුතු බව ජනාධිපතිවරයා මෙහිදී පෙන්වා දුන්නා. නැගෙනහිර වෙරළ තීරය ආරක්ෂා කර ගනිමින් සංචාරක කර්මාන්තය ප්රවර්ධනය කිරීමට නිසි සැලැස්මක් කඩිනමින් සකස් කරන ලෙසත්, ඔලුගිල් වරාය හා ධීවර වරාය ආශ්රිත ගැටලුවලට ස්ථීර විසඳුම් ලබා දිය හැකි විද්යාත්මක ක්රමවේදයක් අධ්යයනය කරන ලෙසත් නිලධාරීන්ට උපදෙස් ලබා දුන්නා.
එසේම යුද ගැටුම් අවසන් වී වසර 16ක් ගත වුවද නැගෙනහිර පළාතේ අවතැන් වූ ජනතාව නැවත පදිංචි කිරීමට නිශ්චිත වැඩපිළිවෙළක් නොමැති වීම පිළිබඳව ජනාධිපතිවරයා අවධානය යොමු කළ අතර, ඔවුන් නැවත පදිංචි කිරීමේ සැලසුම් කඩිනම් කරන ලෙස උපදෙස් ලබා දුන්නා. අම්පාර දිස්ත්රික්කයේ පවතින ගංවතුර තත්ත්වයන්ට ස්ථීර විසඳුම්, උක් ගොවීන් මුහුණ දෙන ගැටලු, පුරාවිද්යා රක්ෂිත ආරක්ෂා කිරීම සහ සංවර්ධන ව්යාපෘතිවල ප්රගතිය පිළිබඳව ද මෙහිදී දීර්ඝ වශයෙන් සාකච්ඡා කෙරුණා.
අම්පාර දිස්ත්රික්කයේ සංවර්ධන ව්යාපෘති වෙනුවෙන් 2026 අය-වැයෙන් රුපියල් මිලියන 22,000ක් වෙන් කර ඇති අතර, එම ප්රතිපාදන මූල්ය වර්ෂය තුළම නිසි ලෙස යොදවමින් ජනතාවට ප්රතිලාභ ලබා දීම රාජ්ය නිලධාරීන්ගේ වගකීමක් බව ජනාධිපතිවරයා අවධාරණය කළා. එසේම, වසර 5කට පෙර ලබා දී ක්රියාත්මක නොවූ වාණිජ වටිනාකමින් යුත් ඉඩම් මහවැලි අධිකාරියෙන් පවරාගෙන ජනතාවට ලබා දීමට පියවර ගන්නා ලෙස ද ඔහු නිලධාරීන්ට උපදෙස් දුන්නා.
