ඊශ්රායලය විසින් සිදු කරන ලද ඉලක්කගත ප්රහාරයකින් හමාස් සංවිධානයේ නව සන්නද්ධ අංශ ප්රධානියා වන මොහොමඩ් ඕඩේ (Mohammad Odeh) ජීවිතක්ෂයට පත්වීමත් සමඟ, ගාසා තීරයේ නොසන්සුන්කාරී වාතාවරණයක් උද්ගතව තිබේ. ඔහුගේ දේහය රැගත් අවමංගල්ය පෙරහැරක් බදාදා ගාසා නගරයේ වීදි ඔස්සේ ගමන් කළ අතර, ඊශ්රායලය විසින් හමාස් සංවිධානයේ ඉහළ පෙළේ නායකයින් ඉලක්ක කර ගනිමින් සිදු කරන මෙහෙයුම් තවදුරටත් උත්සන්න කර ඇත.
මීට සතියකට පමණ පෙර හමාස් සන්නද්ධ අංශයේ හිටපු ප්රධානියා වූ ඉස් අල්-දින් අල්-හඩාඩ් (Izz al-Din al-Haddad) ද ඊශ්රායල ගුවන් ප්රහාරයකින් මිය ගියේය. මෙම නායකයින් අනුක්රමිකව මිය යාම නිසා හමාස් සන්නද්ධ අංශයේ නායකත්වය දැඩි අර්බුදයකට ලක්ව ඇති බව වාර්තා වේ.
පෙරේදා රාත්රියේ සිදු වූ මෙම ප්රහාරයෙන් ඕඩේ මහතාගේ බිරිඳ සහ පුත්රයා ද මිය ගොස් ඇත. අවමංගල්ය උත්සවයේදී අදහස් දැක්වූ ඔහුගේ ඥාතියෙකු සඳහන් කළේ, ඊශ්රායලයේ මෙම මිලිටරි ක්රියාමාර්ග මගින් පලස්තීන ජනතාවගේ අරගලය නැවැත්විය නොහැකි බවත්, එම අරගලය ඕනෑම මට්ටමකින් ඉදිරියටත් පවතින බවත්ය.වසර දෙකක් පුරා ක්රියාත්මක වන ඊශ්රායල හමුදා මෙහෙයුම් හමුවේ ගාසා තීරයේ බොහෝ ගොඩනැගිලි විනාශ වී ඇති අතර, දෙපාර්ශවය අතර සටන් විරාමයක් පවතින බව පැවසුවද ගැටුම් තවදුරටත් උත්සන්න වී තිබේ. දැනට පවතින සාම සාකච්ඡා ද එකතැන පල්වෙමින් පවතින බව වාර්තා වේ.
