ජාතික පරිසර දිනයට සමගාමීව ක්රියාත්මක වන ජාතික පාරිසරික සතිය අද (මැයි 30) ආරම්භ වේ. එහි සමාරම්භක උත්සවය පරිසර නියෝජ්ය අමාත්ය ඇන්ටන් ජයකොඩි මහතාගේ ප්රධානත්වයෙන් සහ මහා සංඝරත්නයේ ආශිර්වාද මධ්යයේ මල්කේන ශ්රී වාපිකාරාමයේදී පැවැත්වේ.
මෙවර සතියේ ප්රධාන තේමාව වන්නේ “ආකල්ප ප්රවර්ධනය තුළින් පරිසර සංරක්ෂණය” යන්නයි. පරිසරය ආරක්ෂා කිරීම නීතිමය රාමුවකට පමණක් සීමා නොකර, මිනිස් සිත් තුළ ආධ්යාත්මික හා ගුණාත්මක ආකල්පමය වෙනසක් ඇති කිරීම මෙම වැඩසටහනේ මූලික අරමුණ වේ.
මෙම ජාතික වැඩසටහනේ පළමු පියවර ලෙස “අටවිසි බෝධීන් වහන්සේලා රෝපණය කිරීමේ” වැඩසටහන දියත් කෙරේ. නා, සල්, කුඹුක්, මුරුත, මාර, දිවුල් සහ ඇසතු වැනි ශාක අටවිසි බෝධි වෘක්ෂයන් ලෙස රෝපණය කිරීම හරහා පරිසරය කෙරෙහි පවතින ආගමික හා සංස්කෘතික බැඳීම යළි තහවුරු කිරීමටත්, ඒ තුළින් සමාජයේ පරිසර හිතකාමී ආකල්ප ඉහළ නැංවීමටත් අපේක්ෂා කෙරේ.
මෙය රජයේ හරිත ප්රතිපත්තියේ දිගුවක් වන අතර, අනාගත පරපුර උදෙසා වනාන්තර ඝනත්වය ඉහළ නැංවීම, වඳවී යන ශාක සුරැකීම සහ නාගරික මෙන්ම ග්රාමීය කලාප හරිතකරණය කිරීමේ දීර්ඝකාලීන ජාතික වැඩපිළිවෙළෙහි තවත් සුවිශේෂී පියවරක් ලෙස මෙය ක්රියාත්මක වේ.
