රටේ නිදහස් සෞඛ්ය පද්ධතියේ කාර්යක්ෂමතාව ඉහළ නැංවීමේ අරමුණින් රාජ්ය සෞඛ්ය කළමනාකරණ සහකාර සේවයේ III ශ්රේණිය සඳහා තවත් නිලධාරීන් 237 දෙනෙකු බඳවා ගැනීමට සෞඛ්ය හා ජනමාධ්ය අමාත්යාංශය පියවර ගෙන තිබේ. සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ උපදෙස් මත ක්රියාත්මක වන මෙම බඳවා ගැනීමේ ක්රියාවලිය, අමාත්යාංශය යටතේ පවතින රෝහල් සහ ආයතනවල පවතින පුරප්පාඩු සම්පූර්ණ කරමින් සෞඛ්ය සේවාවේ ගුණාත්මකභාවය ඉහළ නැංවීම අරමුණු කරගනිමින් සිදුකෙරේ. ඒ අනුව, බඳවා ගැනීමට අදාළ සම්මුඛ පරීක්ෂණ එළඹෙන ජූනි මස 20 සහ 21 යන දිනවලදී පැවැත්වීමට මේ වන විට සියලු කටයුතු සූදානම් කර ඇත.
මෙම බඳවා ගැනීම් පදනම් වන්නේ ශ්රී ලංකා විභාග දෙපාර්තමේන්තුව විසින් 2025 අගෝස්තු 31 වන දින පවත්වන ලද විවෘත තරග විභාගයේ ප්රතිඵල මත වන අතර, එම විභාගයෙන් ලකුණු 141ක හෝ ඊට වැඩි ප්රමාණයක් ලබා ගත් අපේක්ෂකයින් පමණක් සම්මුඛ පරීක්ෂණය සඳහා කැඳවීමට තීරණය කර තිබේ. සුදුසුකම් සපුරා ඇති අපේක්ෂකයින් වෙත මේ වන විටත් ලියාපදිංචි තැපෑල මගින් සම්මුඛ පරීක්ෂණ සඳහා කැඳවීම් ලිපි යොමු කර ඇති අතර, ඒ සම්බන්ධ වැඩිදුර තොරතුරු සෞඛ්ය හා ජනමාධ්ය අමාත්යාංශයේ නිල වෙබ් අඩවිය හරහා ලබා ගත හැකි බව ද නිවේදනය කෙරේ.
පසුගිය ජනවාරි මාසයේදී මෙම සේවාව සඳහා 213 දෙනෙකුගෙන් යුත් පළමු කණ්ඩායම බඳවා ගැනීමෙන් අනතුරුව, මෙවර බඳවා ගනු ලබන්නේ එහි දෙවන කණ්ඩායමයි. රාජ්ය සේවයේ පුරප්පාඩු පියවීම හරහා සෞඛ්ය පද්ධතියේ පරිපාලනමය ශක්තිය වර්ධනය කිරීම කෙරෙහි රජය මේ තුළින් ඉහළ අවධානයක් යොමු කර තිබේ. අදාළ බඳවා ගැනීම් හරහා සෞඛ්ය සේවාවන්හි මෙහෙයුම් කටයුතු තවදුරටත් විධිමත් වනු ඇතැයි අපේක්ෂා කෙරෙන අතර, ඉදිරියේදීත් සෞඛ්ය ක්ෂේත්රයේ මානව සම්පත් සංවර්ධනය වෙනුවෙන් මෙවැනි පියවර ගැනීම අත්යවශ්ය කරුණක් ලෙස අමාත්යාංශය විසින් හඳුනාගෙන ඇත.
