විදුහල්පතිවරුන් මුහුණ දෙන දිගුකාලීන වැටුප් විෂමතා ගැටලුව ස්ථිරවම විසඳීම සඳහා කැබිනට් අනුමැතිය හිමිව ඇති බව අග්රාමාත්ය ආචාර්ය හරිනි අමරසූරිය මෙණෙවිය ප්රකාශ කළාය. විවෘත විශ්වවිද්යාලයේ කුරුණෑගල ප්රාදේශීය මධ්යස්ථානයේ ආචාර්ය මණ්ඩලය සහ රාජ්ය නිලධාරීන් සමඟ පසුගියදා (5) පැවැති විශේෂ සාකච්ඡාවකදී අග්රාමාත්යවරිය මේ බව කියා සිටියාය.
එහිදී කුරුණෑගල විවෘත විශ්වවිද්යාල ශාඛාවේ පැවැති ඉඩකඩ සහ යටිතල පහසුකම් හිඟයට විසඳුම් ලෙස නව ඉඩමක් ලබාදීමට පියවර ගෙන ඇති බවත්, වැඩකරන ජනතාවට අධ්යාපනය දිනාගැනීමට ඇති එකම රාජ්ය විශ්වවිද්යාල පද්ධතිය වෙනුවෙන් රජය උපරිමයෙන් මැදිහත් වන බවත් ඇය අවධාරණය කළාය.
රටේ අධ්යාපන ක්ෂේත්රයේ වත්මන් ප්රගතිය පිළිබඳව අදහස් දැක්වූ අග්රාමාත්යවරිය,
“අධ්යාපන ප්රතිසංස්කරණ ක්රියාවලිය කිසිසේත්ම නතර වී නැහැ. 2027 වසරේදී 2 වැනි ශ්රේණිය සහ 6 වැනි ශ්රේණිය සඳහා නව අධ්යාපන ප්රතිසංස්කරණ හඳුන්වා දීමට අවශ්ය කටයුතු මේ වන විටත් සූදානම් කෙරෙමින් පවතිනවා. මෙම වසරේ ආරම්භ කළ 1 වැනි ශ්රේණියේ ප්රතිසංස්කරණවලට අදාළ 2 වැනි සහ 3 වැනි වාර සඳහා වන පෙළපොත් සියල්ල දැනටමත් නිකුත් කර අවසන්. එමෙන්ම ලබන වසරට අදාළ ගුරු පුහුණු කටයුතු ද කඩිඩනමින් ඇරඹීමට නියමිතයි.” යැයි පැවසුවාය.
මීට අමතරව ගුරුවරුන්ගේ කාර්යක්ෂමතා කඩඉම් විභාග සම්බන්ධයෙන් රාජ්ය සේවා කොමිෂන් සභාව සමඟ සාකච්ඡා කර අනුමැතිය ලබාගෙන ඇති බැවින්, මෙම වසර තුළ එම ගැටලුව ද නිරාකරණය කරන බව අගමැතිනිය වැඩිදුරටත් සඳහන් කළාය.
මෙම අවස්ථාවට කුරුණෑගල දිස්ත්රික් පාර්ලිමේන්තු මන්ත්රී ධර්මප්රිය දිසානායක මහතා සහ විවෘත විශ්වවිද්යාලයේ කුරුණෑගල මධ්යස්ථානයේ අධ්යක්ෂ අනුෂ්ක බණ්ඩාර මහතා ඇතුළු මහජන නියෝජිතයන් හා රාජ්ය නිලධාරීන් පිරිසක් එක්ව සිටියහ.
