උතුරු පළාතේ පොලිස් මෙහෙයුම් සහ මහජන සේවා කටයුතු තවදුරටත් කාර්යක්ෂම කිරීමේ අරමුණින්, ඉන්දීය රජයේ ප්රදානයක් ලෙස ලැබුණු TATA Xenon Yodha කැබ් රථ 134ක් ශ්රී ලංකා පොලිසිය වෙත නිල වශයෙන් භාර දීම ජනාධිපති අනුර කුමාර දිසානායක මහතාගේ ප්රධානත්වයෙන් ජනාධිපති ලේකම් කාර්යාලයේදී සිදු විය.
මෙම කැබ් රථ මෙරට TATA වාහන සඳහා වන බලයලත් බෙදාහරින්නා වන DIMO සමාගම හරහා සපයා ඇති අතර, ඉන්දීය මහ කොමසාරිස් සන්තෝෂ් ජා මහතා ඇතුළු රාජ්ය තාන්ත්රිකයින් සහ පොලිස්පති ප්රියන්ත වීරසූරිය මහතා ඇතුළු උසස් නිලධාරීන් පිරිසක් මෙම අවස්ථාවට එක් වූහ.
උතුරු පළාතේ දුෂ්කර ප්රදේශවලට ප්රවේශ වීමේ පහසුව, ප්රවාහන කාර්යක්ෂමතාව ඉහළ නැංවීම සහ නීතිය හා සාමය පවත්වා ගැනීමේ කටයුතු සඳහා මෙම රථ පෙළ විශේෂයෙන් යොදවනු ලැබේ. එම මෙහෙයුම් අවශ්යතාවලට ගැලපෙන පරිදි, බලවත් ඩීසල් එන්ජිමක්, විශේෂ ආරක්ෂිත ආවරණ සහ දිගු ආසන පද්ධතියක් වැනි වෙනස්කම් රැසක් සහිතව මෙම රථ නිර්මාණය කර ඇත.
මෙම ව්යාපෘතිය සම්බන්ධයෙන් අදහස් දැක්වූ DIMO විධායක අධ්යක්ෂ රජීව් පණ්ඩිතගේ මහතා සඳහන් කළේ, ජාතික මෙහෙයුම් උදෙසා විශ්වාසනීය ප්රවාහන විසඳුම් සැපයීමට ලැබීම පිළිබඳව සමාගම සතුටු වන බවයි. එසේම, මෙම රථවල දිගුකාලීන ක්රියාකාරීත්වය සහතික කිරීම සඳහා අලෙවියෙන් පසු සේවා, තාක්ෂණික සහාය සහ නියම අමතර කොටස් සැපයීම ඇතුළු පුළුල් සහාය පද්ධතියක් ක්රියාත්මක කරන බව DIMO හි Automotive Engineering Solutions ප්රධාන මෙහෙයුම් නිලධාරී මහේෂ් කරුණාරත්න මහතා වැඩිදුරටත් පැවසීය.
