හිටපු සෞඛ්ය අමාත්ය කෙහෙළිය රඹුක්වැල්ල මහතාගේ කොළඹ 07 පිහිටි නිල නිවස ඉදිරිපිට මල් වඩම් තැබීමේ සිද්ධිය සම්බන්ධයෙන් පැමිණිලි ගොනු කරන ලෙස කොළඹ ප්රධාන මහේස්ත්රාත් අසංග එස්. බෝදරගම මහතා කුරුඳුවත්ත පොලිසියට අද (22) නියෝග කළේය.
ඉමියුනොග්ලොබියුලින් (Immunoglobulin) ඖෂධ වංචාවට විරෝධය පළ කරමින් සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානයේ සභාපති වෛද්ය චමල් සංජීව මහතා විසින් අමාත්යවරයාගේ නිවස ඉදිරිපිට මල් වඩම් තබා මාධ්ය සාකච්ඡාවක් පැවැත්වීම මෙම සිද්ධියට මුල් විය. අමාත්යවරයාගේ දියණිය වන හිරුණිකා රඹුක්වැල්ල මහත්මිය විසින් සිදුකළ පැමිණිල්ලකට අනුව, සැකකරු නිවස ඉදිරිපිට අපහාසාත්මක ලෙස කටයුතු කරමින් අපරාධමය බිය ගැන්වීමක් සිදු කළ බවට චෝදනා එල්ල වී ඇත.
අදාළ නඩුව කැඳවූ අවස්ථාවේදී කුරුඳුවත්ත පොලිසිය සඳහන් කළේ, මෙම සිද්ධිය සම්බන්ධයෙන් නීතිපතිවරයාගේ උපදෙස් ලබා ගැනීමට යොමු කර ඇති බවයි. කරුණු සලකා බැලූ මහේස්ත්රාත්වරයා, සැකකරු සම්බන්ධයෙන් දණ්ඩ නීති සංග්රහයේ 486 සහ 433 වගන්ති යටතේ පැමිණිලි ගොනු කර අධිකරණයට ඉදිරිපත් කරන ලෙස පොලිසියට නියෝග කළේය.
මෙම නඩුව නැවත සැප්තැම්බර් 14 වැනි දින කැඳවීමට නියමිතය.
