ගෝලීය හෙපටයිටිස් තුරන් කිරීමේ සංවිධානය (CGHE) විසින් ප්රකාශයට පත් කරන ලද 2026 වසරේ “හෙපටයිටිස් තුරන් කිරීමේ ශූරයන්” (Hepatitis Elimination Champions) අතරට ජාතික ලිංගාශ්රිත රෝග සහ ඒඩ්ස් මර්දන වැඩසටහනේ විශේෂඥ වෛද්ය සත්යා හේරත් මහත්මිය තේරී පත්ව තිබේ.
ජූලි 28 වැනි දිනට යෙදෙන ලෝක හෙපටයිටිස් දිනට සමගාමීව මෙම සම්මානය හිමි වී ඇති අතර, හෙපටයිටිස් තුරන් කිරීම සඳහා කැපවීම, මහජන දැනුවත්භාවය, ප්රතිපත්ති සංවර්ධනය සහ සේවා සැපයීම අතින් සුවිශේෂී දායකත්වයක් ලබා දුන් ලොව පුරා පුද්ගලයන් සිව්දෙනෙකු පමණක් මෙම වසරේ ශූරයන් ලෙස නම් කර ඇත. ප්රජා මූලික සහ නව්ය සේවා ආකෘති හරහා අවදානම් ජන කොටස් වෙත සෞඛ්ය සේවා ළඟා කරවීම, හෙපටයිටිස් C රෝගීන් කල්තියා හඳුනා ගැනීම සහ ප්රතිකාර ආරම්භ කර සුවපත් වීමේ අනුපාතය ඉහළ නැංවීම සඳහා වෛද්ය සත්යා හේරත් මහත්මිය දැක්වූ දායකත්වය මෙම ඇගයීමට මුල් වී තිබේ. ශ්රී ලංකාවේ ‘One Stop Shop’ (එක් ස්ථානයකින් සියලු සේවා) ආකෘතිය සංවර්ධනය කිරීමට නායකත්වය දී ඇති ඇය, රට තුළ ප්රථම වරට කටු හා සිරින්ජ හුවමාරු වැඩසටහන (2021) සහ ප්රජා මූලික හෙපටයිටිස් C ප්රතිකාර සේවාව (2022) හඳුන්වා දීමට පුරෝගාමී වී ඇත. මෙම ජාත්යන්තර පිළිගැනීම 2030 වන විට වෛරස් හෙපටයිටිස් තුරන් කිරීමේ ගෝලීය ඉලක්කය සපුරා ගැනීම සඳහා ශ්රී ලංකාව ගෙන යන උත්සාහයට මහත් රුකුලක් වනු ඇත.
