වෙළෙඳපොළ ප්රවේශය පුළුල් කිරීමට සහ අපනයන ඉලක්ක සපුරා ගැනීමට වැඩි දායකත්වයක් ලබා දෙන ලෙස වාණිජ, ආහාර සුරක්ෂිතතා සහ සමුපකාර සංවර්ධන අමාත්ය වසන්ත සමරසිංහ මහතා වාණිජ දෙපාර්තමේන්තුවේ ප්රධානීන්ට උපදෙස් දී තිබේ.
අමාත්යවරයා මෙම උපදෙස් ලබා දුන්නේ, වාණිජ දෙපාර්තමේන්තුවේ ප්රගති සමාලෝචන රැස්වීමට එක්වෙමිනි.
ශ්රී ලංකාවේ ජාත්යන්තර වෙළෙඳ ප්රතිපත්ති රාමුව ශක්තිමත් කිරීම, වෙළෙඳපොළ ප්රවේශය පුළුල් කිරීම මෙන්ම වෙළෙඳ, ආයෝජන සහ සංචාරක ප්රවර්ධනය වෙනුවෙන් වාණිජ දෙපාර්තමේන්තුව ඉටු කරන කාර්යභාරය මෙහිදී ඇගයීමට ලක් විය.
ද්වීපාර්ශ්වික, කලාපීය සහ බහුපාර්ශ්වික වෙළෙඳ සබඳතා හරහා නව වෙළෙඳපොළ ප්රවේශයන් ලබා ගැනීමටත්, රජයේ අපනයන ඉලක්ක සපුරා ගැනීමටත් වඩාත් සක්රිය ලෙස දායක වන ලෙස අමාත්යවරයා උපදෙස් දුන්නේය.
වේගයෙන් වෙනස් වන ගෝලීය වෙළෙඳ පරිසරයට සහ මතුවන අභියෝගවලට සාර්ථකව මුහුණ දිය හැකි වන පරිදි දෙපාර්තමේන්තුවේ ආයතනික ධාරිතාව තවදුරටත් ශක්තිමත් කිරීමේ අවශ්යතාව ඔහු අවධාරණය කළේය.
ශ්රී ලංකාව ඉහළ මධ්යම ආදායම් ලබන රටක් කරා ගමන් කිරීමේදී, යුරෝපීය සංගමය සමඟ පවතින ආර්ථික හා වෙළෙඳ සබඳතා තවදුරටත් ශක්තිමත් කර ගනිමින් මීළඟ EU GSP+ සහන ක්රමය සඳහා උපායමාර්ගිකව සූදානම් විය යුතු බව අමාත්යවරයා සඳහන් කළේය.
එක්සත් රාජධානියේ සංවර්ධනය වන රටවල වෙළෙඳ යෝජනාක්රමය (UK DCTS) යටතේ පවතින අවස්ථාවන් සහ ලිහිල් කරන ලද ප්රභවස්ථාන නීති (Rules of Origin) පිළිබඳව අපනයනකරුවන් දැනුවත් කරමින්, එම සහනදායී වෙළෙඳපොළ ප්රවේශයන් උපරිමයෙන් ප්රයෝජනයට ගෙන අපනයන වර්ධනය කර ගත යුතු බව පෙන්වා දෙන ලදී.
