ශ්රී ලංකා – රුසියා ද්විපාර්ශ්වික ආර්ථික සහයෝගීතාව ශක්තිමත් කිරීමේ අරමුණින් රුසියානු ඉදිකිරීම් අංශ නියෝජිත පිරිසක් ශ්රී ලංකාවේ සංචාරයක නිරත වී තිබේ.
රුසියානු සමූහාණ්ඩුවේ ජාතික ඉදිකිරීම්කරුවන්ගේ සංගමයේ (NOSTROY) උප සභාපති ඇන්ටන් මොරොස් මහතාගේ නායකත්වයෙන් යුත්, ප්රමුඛ පෙළේ සමාගම්වල ජ්යෙෂ්ඨ නියෝජිතයන් සහ තාක්ෂණික විශේෂඥයන් 24 දෙනෙකුගෙන් සමන්විත මෙම දූත පිරිස ශ්රී ලංකාවට පැමිණියහ.
ඔවුන් විදේශ කටයුතු අමාත්යාංශයේදී, විදේශ කටයුතු, විදේශ රැකියා සහ සංචාරක වැඩබලන ඇමැති අරුන් හේමචන්ද්ර සහ සංචාරක නියෝජ්ය ඇමැති රුවන් රණසිංහ යන මහත්වරුන් හමු විය.
යටිතල පහසුකම් සංවර්ධනය, ආයෝඡන සහ කුසලතා සහිත ශ්රම හුවමාරුව යන අංශවල සහයෝගීතාව වැඩි දියුණු කිරීමෙන් දෙරටටම ප්රත්යක්ෂ ආර්ථික ප්රතිලාභ අත්වන බව වැඩබලන ඇමතිවරයා පෙන්වා දුන්නේය.
සංචාරක නියෝජ්ය ඇමැතිවරයා මෙරට සංචාරක අංශයේ, හෝටල් සංවර්ධනය සහ සංචාරක යටිසැළැස්වල ආයෝජන අවස්ථා පිළිබඳව නියෝජිතයන්ට පැහැදිලි කළේය.
මෙම සංචාරය අතරතුර රුසියානු දූත පිරිස ප්රවාහන, මහාමාර්ග සහ නාගරික සංවර්ධන අමාත්යාංශය, නාගරික සංවර්ධන අධිකාරිය, ආයෝජන මණ්ඩලය මෙන්ම ශ්රී ලංකා විදේශ රැකියා නියුක්ති කාර්යාංශය (SLBFE) සමඟ ද සාකච්ඡා පවත්වමින් ශ්රී ලාංකික ඉදිකිරීම් වෘත්තිකයින්ට රුසියාවේ රැකියා අවස්ථා පුළුල් කිරීමේ මාර්ග ගවේෂණය කළහ.
