මහනුවර ඇසළ පෙරහර මංගල්යය ඉතා සාර්ථකව පැවැත්වීමට අවශ්ය උපරිම සහය සහ මැදිහත් වීම රජය ලබාදෙන බව ජනාධිපති ලේකම් ආචාර්ය නන්දික සනත් කුමාරනායක මහතා සඳහන් කර තිබේ.
ජනාධිපති ලේකම්වරයාගේ ප්රධානත්වයෙන් ජනාධිපති කාර්යාලයේදී ඓතිහාසික කන්ද උඩරට ඇසළ පෙරහර මංගල්යය – 2026 සංවිධාන කටයුතු පිළිබඳව සහ එහි ප්රගතිය සම්බන්ධයෙන් සාකච්ඡාවක් පවත්වන ලදී.
මෙවර කුඹල් පෙරහර මංගල්යය අගෝස්තු මස 18 වැනිදා සිට 22 වැනිදා දක්වා පැවැත්වීමට නියමිත අතර, රන්දෝලි පෙරහර මංගල්යය අගෝස්තු මස 23 වැනිදා සිට ආරම්භ වේ. අවසන් මහා රන්දෝලි පෙරහර අගෝස්තු 27 වැනි දින රාත්රි වීථි සංචාරය කරන අතර, අගෝස්තු 28 වැනි දින අලුයම දියකැපීමේ චාරිත්රය සිදු කිරීමෙන් පසු එදින දහවල් පෙරහර වීථි සංචාරය කිරීමෙන් පෙරහර මංගල්යය නිමාවට පත් වේ.
කන්ද උඩරට විශාලතම ආගමික සහ සංස්කෘතික මංගල්යයට ජනාධිපති අනුර කුමාර දිසානායක මහතා ඇතුළු රජය දක්වන මැදිහත් වීම සම්බන්ධයෙන් මල්වතු අස්ගිරි උභය පාර්ශ්වවල ආශීර්වාදය හිමි වන බව මල්වතු මහා විහාරයීය මහා ලේඛකාಧಿಕාරි ආචාර්ය පහමුණේ ශ්රී සුමංගල නාහිමිපාණන් වහන්සේ ප්රකාශ කළහ.
පෙරහර නැරඹීමට පැමිණෙන බැතිමතුන්ට අවශ්ය ජලය, විදුලිය, සනීපාරක්ෂක සහ ප්රවාහන කටයුතු ඇතුළු පහසුකම් සැලසීම මෙන්ම පෙරහරට අලි ඇතුන් ලබා ගැනීම කෙරෙහි මෙම සාකච්ඡාවේදී විශේෂ අවධානය යොමු විය.
මෙම සාකච්ඡාව සඳහා ශ්රී දළදා මාලිගාවේ දියවඩන නිලමේ ප්රදීප් නිලංග දෑල මහතා ඇතුළු රාජ්ය ආයතනවල නිලධාරීහු, අනුග්රාහක සමාගම්වල නියෝජිතයෝ සහ ආරක්ෂක අංශවල ජ්යෙෂ්ඨ නිලධාරීහු පිරිසක් එක්ව සිටියහ.
