අපරාධ පරීක්ෂණ දෙපාර්තමේන්තු භාරයේ සිටියදී පලායාමට කුමන්ත්රණය කළේ යැයි චෝදනා ලබා සිටින නදුන් චින්තක වික්රමරත්න හෙවත් “හරක් කටා” ඇතුළු විත්තිකරුවන් පස්දෙනකුට එරෙහිව ත්රස්තවාදය වැළැක්වීමේ පනත යටතේ චෝදනා පවත්වාගෙන යාමට නොහැකි බවට ඉකුත් දා ලබාදුන් තීන්දුවට එරෙහිව අභියාචනයක් ඉදිරිපත් කිරීමට තීරණය කර ඇතැයි නීතිපතිවරයා අද (03) කොළඹ මහාධිකරණය හමුවේ දැනුම් දී තිබේ.
මෙම නඩුව කොළඹ මහාධිකරණ විනිසුරු බුද්ධික සී රාගල මහතා ඉදිරියේ කැඳවූ අවස්ථාවේදී නීතිපතිවරයා වෙනුවෙන් පෙනී සිටි රජයේ නීතිඥ සජිත් බණ්ඩාර මහතා මෙම දැනුම් දීම සිදු කර ඇත.
විත්තිකරුවන්ගේ ඇප ඉල්ලීම් සම්බන්ධයෙන් කරුණු දැක්වූ රජයේ නීතිඥවරයා සඳහන් කළේ, අභියාචනයක් ඉදිරිපත් කිරීමට තීරණය කර ඇති නිසා මෙම අවස්ථාවේදී ඇප ඉල්ලීම සලකා බැලීම සුදුසු නොවන බවත්, ඔවුන් ඇප මත මුදා හරිනු ලැබුවහොත් යළි අධිකරණයට ගෙන්වා ගැනීමේ බරපතළ ගැටලුකාරී තත්ත්වයක් පවතින බැවින් ලිඛිතව විරෝධතා ගොනු කිරීමට අපේක්ෂා කරන බවත්ය.
කෙසේ වෙතත්, විත්තිය වෙනුවෙන් පෙනී සිටී නීතිඥවරුන් සඳහන් කළේ අභියාචනයක් ඉදිරිපත් කරන බව පැවසූ පමණින් ඇප ඉල්ලීම පසෙක දැමිය නොහැකි බවත්, සිය සේවාදායකයන් මේ වන විටත් වසර තුනකට වැඩි කාලයක් රිමාන්ඩ් භාරයේ පසුවන බැවින් ඔවුන්ගේ ඇප ඉල්ලීම් සලකා බලා තීන්දුවක් ලබාදෙන ලෙසත් ඉල්ලා සිටියේය.
ඉදිරිපත් වූ කරුණු සලකා බැලූ අධිකරණය, සැකකරුවන්ගේ ඇප ඉල්ලීම පිළිබඳ නියෝගය අගෝස්තු මස 20 වන දින ප්රකාශයට පත් කරන බව නියෝග කළේය. එසේම, ත්රස්තවාදී වැළැක්වීමේ පනත යටතේ වූ චෝදනා ඉවත් කර තිබෙන බැවින්, තංගල්ල පැරණි බන්ධනාගාරයේ රඳවා සිටින හරක් කටා නමැති විත්තිකරු සුදුසු වෙනත් බන්ධනාගාරයක රඳවා තබන ලෙසද විනිසුරුවරයා වැඩිදුරටත් නියෝග කර ඇත.
