මහවැලි B සහ C කලාපවල හෙක්ටයාර් පනස් දහසකට වැඩි භූමි ප්රමාණයක වගා කරන ලද අස්වනු නෙළන අවස්ථාවක, ඉතිහාසයේ කවරදාකවත් සිදු නොවූ අයුරින් වී මිල පහළ බැසීම සහ මහා පරිමාණ මෝල් හිමියන් විවිධ අඩුපාඩු පෙන්වමින් ගොවීන් රස්තියාදු කිරීම හේතුවෙන් ගිරාඳුරුකෝට්ටේ සහ වැලිකන්ද ඇතුළු ප්රදේශවල ගොවි ජනතාව අන්ත අසරණ තත්ත්වයකට පත්ව සිටිති. කන්නයක් සඳහා ලක්ෂ හතරකට අධික නිෂ්පාදන වියදමක් දැරීමට සිදුව ඇති පසුබිමක, රුපියල් 85ත් 100ත් අතර අවම මිලකට හෝ තම වී අස්වැන්න අලෙවි කරගත නොහැකි වීම නිසා ගොවීන්ට බැංකු ණය, ට්රැක්ටර් කුලී, පොහොර සහ කෘෂි රසායනික ණය පවා ගෙවා ගැනීමට නොහැකි වී තිබේ.
රජයේ ගබඩා වෙත වී අස්වැන්න ලබාදීමේදී පැන නැගී ඇති සීමා කිරීම් සහ ප්රමාදයන් හේතුවෙන් ගොවීහු දැඩි පීඩාවකට මුහුණ දී සිටින අතර, මහා පරිමාණ මෝල් හිමියන්ගේ ඒකාධිකාරය හමුවේ ඔවුන්ගේ ජීවනෝපාය සම්පූර්ණයෙන්ම බිඳ වැටී ඇති බව ගොවි සංවිධාන පෙන්වා දෙති. දරුවන්ගේ අධ්යාපන කටයුතු පවත්වාගෙන යාමට සහ දෛනික ජීවන වියදම් පියවා ගැනීමට නොහැකිව මූල්යමය වශයෙන් දැඩි පීඩනයකට ලක්ව සිටින ගොවි ජනතාව ප්රකාශ කරන්නේ, මෙම තත්ත්වය තවදුරටත් පැවතුණහොත් ඉදිරියේදී ඔවුන්ට වී ගොවිතැනෙන් සම්පූර්ණයෙන්ම ඉවත් වීමට සිදුවන බවයි.
ආර්ථික අර්බුද හමුවේ අසරණ වී සිටින මෙම ගොවීන් ආරක්ෂා කර ගැනීම සඳහා රජය මඟින් ක්රමවත් මිලදී ගැනීමේ යාන්ත්රණයක් කඩිනමින් ක්රියාත්මක නොකළහොත්, මෙරට ආහාර සුරක්ෂිතතාවට මෙන්ම කෘෂිකාර්මාන්තයේ අනාගතයට එය අතිශය අහිතකර ලෙස බලපානු ඇති බව කෘෂි විශ්ලේෂකයෝ අනතුරු අඟවා සිටිති.
