ළමයින් සම්බන්ධ පුවත් වාර්තා කිරීමේදී ඔවුන්ගේ ගෞරවය, පෞද්ගලිකත්වය සහ රහස්යභාවය ආරක්ෂා කිරීම සඳහා ජාතික මාධ්ය මාර්ගෝපදේශ සංග්රහයක් සකස් කර ඇති බව කාන්තා සහ ළමා කටයුතු පිළිබඳ අමාත්යාංශයීය උපදේශක කාරක සභාවේදී අවධාරණය කර තිබෙනවා.
කාන්තා සහ ළමා කටයුතු අමාත්ය සරෝජා සාවිත්රි පෝල්රාජ් මහත්මියගේ සභාපතිත්වයෙන් පසුගිය 22 වැනිදා පාර්ලිමේන්තුවේදී රැස්වූ කාරක සභාවේදී මේ පිළිබඳව සාකච්ඡා කර තිබෙනවා.
මුද්රිත, විද්යුත් සහ සමාජ මාධ්ය ඔස්සේ ළමයින් සම්බන්ධ පුවත් වාර්තා කිරීමේදී ඔවුන්ගේ උපරිම යහපත, පුවත්වල සත්යතාව සහ සාධාරණත්වය ආරක්ෂා කිරීම මෙම මාර්ගෝපදේශවල ප්රධාන අරමුණු වනවා. එමෙන්ම ළමයින් සහ ඔවුන්ගේ පවුල් අනවශ්ය ලෙස මාධ්ය ඔස්සේ නිරාවරණය වීම වැළැක්වීම සහ ආබාධිත දරුවන්ගේ ගෞරවය හා අයිතිවාසිකම් ආරක්ෂා කිරීමේ අවශ්යතාව ද මෙහිදී අවධාරණය වී තිබෙනවා.
දෙමළ භාෂාව කතා කරන ප්රදේශවල කාන්තා හා ළමා ඒකක ශක්තිමත් කිරීම සඳහා දෙමළ භාෂාව හැසිරවිය හැකි කාන්තා පොලිස් නිලධාරිනියන් බඳවා ගැනීම සහ පුහුණු කිරීම පිළිබඳව ද සාකච්ඡා කර තිබෙනවා. යාපනය ඇතුළු ප්රදේශවල කාන්තාවන්ට සහ ළමයින්ට පැමිණිලි ඉදිරිපත් කිරීමේදී මුහුණදීමට සිදුවන භාෂාමය අපහසුතා අවම කිරීම එහි අරමුණයි.
දිවයින පුරා ළමා නිවාස පාලනය සහ අධීක්ෂණය විධිමත් කිරීම සඳහා මධ්යගත තොරතුරු පද්ධතියක් හඳුන්වාදීමේ අවශ්යතාව ද කාරක සභාවේ අවධානයට ලක්ව තිබෙනවා. ළමා නිවාස තුළ දරුවන්ට සිදුවන හිංසන වැළැක්වීම සඳහා එම ආයතනවල කළමනාකාරීත්වයේ වගකීම තහවුරු කිරීමේ වැදගත්කම ද මෙහිදී පෙන්වා දී තිබෙනවා.
වයස අවුරුදු පහට අඩු දරුවන් සිටින මව්වරුන් විදේශ රැකියා සඳහා පිටත්වීම සම්බන්ධයෙන් ද සාකච්ඡා වී ඇති අතර, ඒ පිළිබඳ අවසන් තීරණයක් තාක්ෂණික කමිටුවක් මඟින් ගැනීමට නියමිත බව සඳහන්. විදේශ රැකියාවල නිරත කාන්තාවන්ගේ දරුවන්ගේ අධ්යාපනික වියදම් ප්රතිපූරණය කිරීමේ වැඩසටහනක් ක්රියාත්මක කිරීම පිළිබඳව ද අවධානය යොමු වී තිබෙනවා.
මෙම රැස්වීමට කාන්තා සහ ළමා කටයුතු නියෝජ්ය අමාත්ය වෛද්ය නාමල් සුදර්ශන මහතා ඇතුළු නියෝජ්ය අමාත්යවරුන්, පාර්ලිමේන්තු මන්ත්රීවරුන් සහ අමාත්යාංශ නිලධාරීන් පිරිසක් සහභාගී වී තිබෙනවා.
