පාකිස්තානයේ සිරගතව සිටින හිටපු අගමැති ඉම්රාන් ඛාන්ගේ ප්‍රධාන දේශපාලන බලකොටුව වන කයිබර් පක්තුන්ක්වා පළාතේ හදිසි තත්ත්වයක් ප්‍රකාශයට පත් කරමින්, ඔහුගේ පක්ෂය වන පාකිස්තාන තරීක්-ඊ-ඉන්සාෆ් (PTI) පක්ෂය මෙහෙයවූ පළාත් ආණ්ඩුව අත්හිටුවීමට පියවර ගෙන තිබේ.
ඇෆ්ගනිස්තාන දේශසීමාවට ආසන්න එම පළාතේ සටන්කාමී ප්‍රහාර ඉහළ යෑම හේතුවෙන් ජනාධිපති අසිෆ් අලි සර්දාරි විසින් මෙම හදිසි තත්ත්වය ප්‍රකාශයට පත් කර ඇත. සටන්කාමීත්වය පාලනය කිරීමට පළාත් ආණ්ඩුව අසමත් වූ බවට චෝදනා කරමින්, සර්දාරිගේ පක්ෂයට සම්බන්ධ විරුද්ධ පාර්ශ්වයේ පුද්ගලයකු එහි පාලන වගකීම සඳහා පත් කර තිබේ.
කෙසේ වෙතත්, PTI පක්ෂය පවසන්නේ මෙම පියවර දේශපාලන බලය අත්පත් කර ගැනීමේ උත්සාහයක් බවයි. එමඟින් පළාත් අයවැයෙන් ලැබෙන සම්පත් පක්ෂයට අහිමි වන අතර, ඉම්රාන් ඛාන් නිදහස් කරන ලෙස ඉල්ලා ආධාරකරුවන් ඉස්ලාමාබාද් වෙත ගමන් කිරීම වැළැක්වීමද මෙහි අරමුණක් බවට පක්ෂය චෝදනා කරයි. හදිසි පාලනයට එරෙහිව PTI පක්ෂය පෙෂාවර් මහාධිකරණය හමුවේ අභියෝගයක්ද ඉදිරිපත් කර තිබේ.
ඉම්රාන් ඛාන් නිදහස් කරන ලෙසත්, ඔහුට අවශ්‍ය වෛද්‍ය ප්‍රතිකාර ලබාදෙන ලෙසත් ඉල්ලා පැවැත්වීමට සැලසුම් කළ පා ගමනට පෙර ඔහුගේ සහෝදරියන් තිදෙනා ඇතුළු ආධාරකරුවන් සිය ගණනක් අත්අඩංගුවට ගෙන ඇති බව වාර්තා වේ.
මේ අතර, ඉම්රාන් ඛාන්ගේ සෞඛ්‍ය තත්ත්වය පිරිහෙමින් පවතින බව ඔහුගේ පවුලේ සාමාජිකයෝ පවසති. එක් ඇසක පෙනීම අඩුවීම, රුධිර පීඩනය වෙනස් වීම සහ හුදකලා සිරගත කිරීමෙන් ඇතිවූ මානසික බලපෑම් සම්බන්ධයෙන් ඔහුට කඩිනම් වෛද්‍ය සහාය අවශ්‍ය බව ඔවුහු අවධාරණය කරති. දූෂණ චෝදනා මත 2023 වසරේ සිට සිරගතව සිටින 74 හැවිරිදි ඉම්රාන් ඛාන් එම චෝදනා ප්‍රතික්ෂේප කරයි.
පාකිස්තාන රජය සහ PTI පක්ෂය අතර පසුගිය සතියේ පැවති සාකච්ඡාවලදී ඉම්රාන් ඛාන්ට පෞද්ගලික වෛද්‍ය ප්‍රතිකාර ලබාදීම, සිරගෙදරදී ඔහු හමුවීමට අවසර දීම සහ ලන්ඩනයේ සිටින ඔහුගේ පුතුන් සමඟ දුරකථන ඇමතුම් ලබාගැනීමට අවස්ථාව සැලසීම ඇතුළු ඉල්ලීම් ඉදිරිපත් වී තිබේ. එහෙත් රජය ඉල්ලා සිටි සටන්කාමීත්වයට එරෙහි ප්‍රසිද්ධ ස්ථාවරයක් ගැනීම ඇතුළු කොන්දේසි PTI පක්ෂය පිළි නොගත් බව නියෝජ්‍ය අභ්‍යන්තර කටයුතු අමාත්‍ය තලාල් චෞද්‍රි ප්‍රකාශ කර ඇත.
මානව හිමිකම් සංවිධාන සහ විශ්ලේෂකයන් හදිසි පාලනය පිළිබඳ ප්‍රශ්න මතු කර ඇති අතර, තත්ත්වය මර්දනකාරී ක්‍රියාමාර්ගවලට තුඩු නොදෙන ලෙස අනතුරු අඟවා තිබේ. පාකිස්තාන මානව හිමිකම් කොමිසම රජයෙන් සහ PTI පක්ෂයෙන් අර්ථවත් දේශපාලන සංවාදයක් යළි ආරම්භ කරන ලෙසද ඉල්ලා ඇත.
