ජාතික සංවර්ධන අරමුණු සාක්ෂාත් කර ගැනීම සඳහා කාර්යක්ෂම හා නවීන තාක්ෂණයෙන් සන්නද්ධ මිනින්දෝරු සේවයක් අත්‍යවශ්‍ය බවත්, ඒ සඳහා අවශ්‍ය පහසුකම් සැලසීමට රජය සූදානම් බවත් ජනාධිපති අනුර කුමාර දිසානායක මහතා පවසයි.
ජනාධිපතිවරයා මේ බව සඳහන් කළේ අද (23) පෙරවරුවේ බත්තරමුල්ල වෝටර්ස් එජ් හෝටලයේ පැවති රජයේ මිනින්දෝරු සංගමයේ 100 වැනි වාර්ෂික සම්මේලනයට එක්වෙමිනි.
මිනින්දෝරු සේවයට අවශ්‍ය නවීන තාක්ෂණික උපකරණ පිළිබඳ තක්සේරු අධ්‍යයනයක් ඉදිරිපත් කරන්නේ නම්, ඒ සඳහා අයවැයෙන් ප්‍රතිපාදන වෙන් කිරීමට සූදානම් බව ජනාධිපතිවරයා පැවසීය. එමෙන්ම මානව සම්පත් සංවර්ධනය, දීමනා සම්බන්ධ ගැටලු සහ සේවා ව්‍යවස්ථාවේ අවශ්‍ය සංශෝධන පිළිබඳවද අවධානය යොමු කරන බව ඔහු සඳහන් කළේය.
රජයේ ආර්ථික තත්ත්වය පිළිබඳව අදහස් දක්වමින් ජනාධිපතිවරයා කියා සිටියේ 2025 වසරේදී අපේක්ෂිත රාජ්‍ය ආදායම් ඉලක්කයෙන් සියයට 110ක් ළඟා කර ගැනීමට හැකි වූ බවයි. එමෙන්ම 2025 වසරේ ජංගම ගිණුමේ අතිරික්තය ඇමෙරිකානු ඩොලර් මිලියන 1,800ක් දක්වා ඉහළ ගිය බවද ඔහු පැවසීය.
කෙසේ වෙතත්, මැදපෙරදිග කලාපයේ යුදමය තත්ත්වය හේතුවෙන් ඉන්ධන ආනයනය සඳහා වැය වන විදේශ විනිමය ප්‍රමාණය ඉහළ යාමේ අවදානමක් පවතින බව ජනාධිපතිවරයා පෙන්වා දුන්නේය. බාහිර ආර්ථික කම්පනවලට ඔරොත්තු දිය හැකි ආර්ථිකයක් ගොඩනැගීම රජයේ අරමුණ බවද ඔහු සඳහන් කළේය.
එමෙන්ම, ලබන වසරේ ප්‍රාග්ධන වියදම රුපියල් බිලියන 2,000ක් දක්වා වැඩි කිරීමට සැලසුම් කර ඇති බවත්, එම වියදම් ඉහළ යාමත් සමඟ විදේශ විනිමය සඳහා ඇති වන පීඩනය කළමනාකරණය කිරීම වැදගත් බවත් ජනාධිපතිවරයා පැවසීය.
රාජ්‍ය සේවයේ ආකර්ෂණය වැඩි කරමින් දක්ෂ වෘත්තිකයන් රඳවා ගැනීම සඳහා 2025 අයවැයෙන් තීරණය කළ මූලික වැටුප් වැඩි කිරීම 2025, 2026 සහ 2027 වසරවල අදියර තුනකින් ක්‍රියාත්මක වන බවද ඔහු සඳහන් කළේය.
අත්‍යවශ්‍ය නොවන හෝ අකාර්යක්ෂම රාජ්‍ය ආයතන 34ක් වසා දැමීම හෝ ඒකාබද්ධ කිරීම පිළිබඳ සොයා බැලීමට මුදල් අමාත්‍යාංශය කමිටුවක් පත් කර ඇති බවද ජනාධිපතිවරයා වැඩිදුරටත් පැවසීය.
රජයේ මිනින්දෝරු දෙපාර්තමේන්තුව සහ වසර 100ක් සපුරන රජයේ මිනින්දෝරු සංගමය මෙරට සංවර්ධනයට ලබා දෙන දායකත්වයද මෙහිදී ජනාධිපතිවරයාගේ ඇගයීමට ලක් විය.
මෙම අවස්ථාවට ඉඩම් සහ වාරිමාර්ග නියෝජ්‍ය අමාත්‍ය අරවින්ද සෙනරත්, පාර්ලිමේන්තු මන්ත්‍රී රුවන්තිලක ජයකොඩි, අදාළ අමාත්‍යාංශයේ ලේකම් ඩී. පී. වික්‍රමසිංහ, මිනුම්පති ටී. එම්. අයි. තිලකරත්න මහතා ඇතුළු නිලධාරීහු සහ රජයේ මිනින්දෝරු සංගමයේ සාමාජිකයෝ සහභාගී වූහ.
