ශ්‍රී ලංකාවේ බලශක්ති යටිතල පහසුකම් සහ තාක්ෂණික ක්ෂේත්‍රයේ දැවැන්ත පෙරළියක් සනිටුහන් කරමින්, LTL සමූහයේ අනුබද්ධිත ලක්දනවි සමාගම මැලේසියාවේ ක්වාලාලම්පූර් නුවර පැවැති 2026 ආසියානු බල සම්මාන සහ ආසියානු ජල සම්මාන උළෙලේදී (Asian Power Awards & Asian Water Awards 2026) ප්‍රධාන සම්මාන පහක් දිනාගැනීමට සමත්ව තිබේ. කලාපීය වේදිකාවක විදුලිබල උත්පාදනය, තාක්ෂණික නවෝත්පාදනය, කාර්මික ජල කළමනාකරණය සහ ආයතනික වගකීම යන ක්ෂේත්‍රයන් හි දක්වන ලද මෙම ඉහළ කාර්යසාධනය, ශ්‍රී ලාංකේය ඉංජිනේරු නිපුණතාව සහ තාක්ෂණික විශිෂ්ටත්වය ජාත්‍යන්තර මට්ටමින් නැවතත් තහවුරු කිරීමට සමත්ව ඇත.
මෙම ජයග්‍රහණයේ ප්‍රධාන ගාමක බලවේගය වූයේ 2010 වසරේ සිට ජාතික විදුලිබල පද්ධතියට අත්‍යවශ්‍ය දායකත්වයක් සපයන 300MW යුගදනවි ඒකාබද්ධ චක්‍රීය බලාගාරයයි. එහිදී ‘වසරේ ස්වාධීන බලශක්ති නිෂ්පාදකයා’ සම්මානය හිමි කරගත් ලක්දනවි සමාගම, දුස්ස්රාවීතාවය මත පදනම් වූ තාපන ආදාන ගෑස් ටර්බයින ඉන්ධන (HFO) සඳහා හඳුන්වා දුන් සාර්ථක ඉංජිනේරු විසඳුම වෙනුවෙන් ‘වසරේ නවෝත්පාදන බලශක්ති තාක්ෂණය’ සම්මානය දිනාගත්තේය. මීට අමතරව පාරිසරික සහ සාමාජීය පාලන මුලපිරීම් වෙනුවෙන් ESG සම්මානය මෙන්ම, මුහුදු ජල පිරිපහදු පහසුකම සහ ජල ප්‍රතිචක්‍රීකරණ ව්‍යාපෘති උදෙසා ආසියානු ජල සම්මාන උළෙලේදී ද ගෞරවනීය ඇගයීම් දෙකක් දිනා ගැනීමට ලක්දනවි සමාගම සමත් විය.
කලාපීය තාක්ෂණික ක්ෂේත්‍රය තුළ ශ්‍රී ලංකාව ලැබූ මෙම විශිෂ්ට පිළිගැනීම සාමාන්‍ය වාණිජ ජයග්‍රහණයකට වඩා එහා ගිය ජාතික අභිමානයක් ලෙස ආර්ථික හා බලශක්ති විචාරකයෝ පෙන්වා දෙති. දේශීය සහ ගෝලීය යටිතල පහසුකම් වෙළෙඳපොළ තුළ සැලසුම්කරණය, ඉදිකිරීම් සහ නඩත්තුව යන සමස්ත ක්‍රියාවලියෙහිම ශ්‍රී ලාංකික ඉංජිනේරුවන්ගේ පවතින උසස් තාක්ෂණික නිපුණතාව මෙමඟින් පිළිබිඹු වන අතර, ඉදිරියේදී ආසියානු කලාපයේ බලශක්ති හා ඉංජිනේරු ව්‍යාපෘති සඳහා දේශීය සමාගම් වෙත වැඩි ජාත්‍යන්තර අවස්ථා ප්‍රමාණයක් විවර වනු ඇතැයි අපේක්ෂා කෙරේ.
