වසර 24 ක් තිස්සේ නොවිසඳුණු ගුරු වැටුප් ගැටලුව විසඳීමේ ඵල ප්‍රයෝජන අපේ ගම්වල දරුවන්ට ලබා දෙන ලෙස, අධ්‍යාපන අමාත්‍ය දිනේෂ් ගුණවර්ධන මහතා පවසයි.
අමාත්‍යවරයා මේ බව පැවසුවේ සිය පාර්ලිමේන්තු විමධ්‍යගත අරමුදලින් සහ පාර්ලිමේන්තු මන්ත්‍රී යදමිණි ගුණවර්ධන මහතාගේ විමධ්‍යගත අරමුදලින් අවිස්සාවේල්ල ආසනයේ අකරවිට, ඉහළ කොස්ගම, මිරිස්වත්ත, බ්‍රැන්ඩිගම්පළ ප්‍රදේශවල ගොවි සංවිධාන, කාන්තා සංවිධාන, ප්‍රජා මූල සංවිධාන හා සුබ සාධක සංවිධානවලට භාණ්ඩ හා එළවළු, පොල් පැල බෙදාදීම සඳහා ඊයේ (16 ) දින එක්වෙමිනි.
පාර්ලිමේන්තු මන්ත්‍රී යදමිණි ගුණවර්ධන, සීතාවක ප්‍රාදේශීය සභාවේ සභාපති ජයන්ත රෝහණ, ප්‍රාදේශීය සභා මන්ත්‍රීවරුන් වන සමන්ත ගමගේ, නන්ද කුමාර, සනී පීරිස් යන අයද මෙම අවස්ථාවන්ට එක් වූහ.
වෙනදා අය වැයෙන් මුදල් වෙන් කරන්නේ, ඉහළ ස්ථරයට වුවත්, මෙවර අය වැයෙන් රජය ප්‍රමුඛතාව දී ඇත්තේ, ගමට බව, සභානායක, අධ්‍යාපන අමාත්‍ය දිනේෂ් ගුණවර්ධන මහතා වැඩි දුරටත් ප්‍රකාශ කළේය. ශ්‍රී ලංකාවට ටයර් පිටරටින් ගෙන්වීම,පිළිබඳ අප ලජ්ජා වියයුතු බවද අමාත්‍යවරයා සඳහන් කළේය. රබර් නිෂ්පාදනය කරන රටක් ලෙස ඉන් ප්‍රයෝජන ගැනීමට එදා පිලිප් ගුණවර්ධන අමාත්‍යතුමා ටයර් කම්හලක් ආරම්භ කළත්, පසුව එය විකුණා දැමූ බවද ඔහු සිහිපත් කළේය. මෙවර අය වැයෙන් නිෂ්පාදන ආර්ථිකයක් සඳහා, රටේ ග්‍රාම සේවා වසම් 14,500 ටම, වෙන වෙනම මුදල් වෙන්කර ඇතැයිද හෙතෙම පැවසීය.
කාන්තාවන්ට, කොන්දේසිවලින් තොරව බැංකු ගිණුම් විවෘත කිරීමට අවස්ථාව සලසා දිය යුතු බවත්, ඉසෙඩ් ස්කෝර් නිර්ණායක අනුව, ඇතැම් ගම්මානවල පාසල්, නගරවල පාසල්වල පහසුකම් මට්ටමට සලකා තිබීම පිළිබඳ අධ්‍යාපන උපදේශක කාරක සභාවේදි පෙන්වා දී ඇති බවත් අමාත්‍යවරයා සඳහන් කළේය. ඒ නිසා ඒ ගැන සලකා බලමින් සිටින බවද අධ්‍යාපන අමාත්‍යවරයා පැවසීය.
