අම්බලන්තොට, කොච්චිම මුහුදු වෙරළේ දිය නෑමට නුසුදුසු ස්ථානයක රළ පාගමින් සිටි තිදෙනෙකු අතුරුදහන් වී ඇති බව පොලිසිය පවසයි.
අද (14) උදෑසන 11 ට පමණ මෙම සිදුවීම සිදුව ඇති අතර රළ පාගමින් සිටි කාන්තාවක් හා පිරිමි ළමුන් තිදෙනෙකු සැඩ රළ පහරකට හසුව මුහුද දෙසට ගසාගෙන ගොස් ඇති බව පොලිස් විමර්ශනවලදී අනාවරණවී ඇත.
මෙම දියේ ගසාගෙන ගිය සිව්දෙනා අතරින් වයස අවුරුදු 18 ක් වු පිරිමි ළමයෙකු රළ පහරින් මිදී නැවත නිරුපද්‍රිතව ගොඩබීමට පැමිණ ඇති අතර අනෙක් තිදෙනා දැනට අතුරුදහන් වී ඇත. අතුරුදහන් වු අය අතර අම්බන්තොට ප්‍රදේශයේ පදිංචි වයස අවුරුදු 55 ක් වු කාන්තාවක්, වයස අවුරුදු 16 ක් වු ඇයගේ පුතා හා දෙනියාය ප්‍ර දේශයේ පදිංචි වයස අවුරුදු 22 ක් වු ඥාති පුතෙකු වේ.
අතුරුදහන් වු පිරිස සොයා අම්බන්තොට පොලිසිය, තංගල්ල සහ කිරින්ද නාවික හමුදා කඳවුරුවල ජිවිතාරක්ෂක නිලධාරීන් හා ප්‍රදේශවාසීන් එක්ව මෙහෙයුම් දියත් කර ඇත. අම්බන්තොට පොලිසිය වැඩිදුර විමර්ශන පවත්වනු ඇත.
