ඇසුරුමෙහි නිෂ්පාදිත දිනය සහ කල් ඉකුත්වන දිනය වෙනස් කර වෙළෙඳපොළට බෙදාහැරීම සඳහා ආනයනික කුරක්කන් ටොන් 22ක් සහ කූනිස්සන් කිලෝග්රෑම් 975ක් ගබඩා කර තිබූ කොළඹ, කොටහේන ප්රදේශයේ ගබඩාවක් මුද්රා තැබීමට පාරිභෝගික කටයුතු පිළිබඳ අධිකාරිය පියවර ගෙන තිබේ.
ඉන්දියාවේ සිට ආනයනය කර ඇති මෙම කුරක්කන් තොගයේ නිෂ්පාදිත දිනය 2024 ලෙස සඳහන් කර එය මාස 12ක් ඇතුළත භාවිත කළ යුතු බවට ඉන්දියානු නිෂ්පාදකයා විසින් සඳහන් කොට තිබුණද මෙරට ආනයනකරු විසින් ඇසුරුම් කළ වර්ෂය හා මාසය 2024 අගෝස්තු සහ කල් ඉකුත්වන වර්ෂය හා මාසය 2026 ජූලි ලෙස ස්ටිකරයක් මගින් වෙනස් කර වෙළෙඳපොළට නිකුත් කිරීමට කටයුතු යොදා තිබිණි.
එමෙන්ම කූනිස්සන් කිලෝග්රෑම් 5 බැගින් වූ ඇසුරුම් 195ක නිෂ්පාදිත වර්ෂය හා මාසය 2024 ජූලි ලෙස හා කල් ඉකුත්වන වර්ෂය හා මාසය 2024 දෙසැම්බර් ලෙස සඳහන් කර තිබුණද ඒ මත, නිෂ්පාදිත වර්ෂය හා මාසය 2024 ඔක්තෝබර් සහ කල් ඉකුත්වීමේ දිනය 2025 සැප්තැම්බර් ලෙස ස්ටිකරයක් මගින් වෙනස්කර වෙළෙඳපොළට නිකුත් කිරීමට කටයුතු යොදා තිබිණි.
මෙම කරුණු අධිකරණයට වාර්තා කර අදාළ ව්යාපාරිකයාට විරුද්ධව නීතිය ක්රියාත්මක කිරීමට කටයුතු යොදා ඇති අතර ඉදිරි උත්සව සමය තුළ මෙවැනි භාණ්ඩ වෙළෙඳපොළට නිකුත් කිරීම වැළක්වීමට දිවයින පුරා විමර්ශන සහ වැටලීම් සිදුකරන ලෙස නිලධාරින්ට උපදෙස් ලබාදී ඇත.
