ඉන්දියාවේ සහ ශ්රී ලංකාවේ සත්කාරකත්වයෙන් පැවැත්වීමට නියමිත 2026 විස්සයි-20 ලෝක කුසලාන ක්රිකට් තරගාවලියට සහභාගී වීම සඳහා වීසා අයදුම් කළ ඇමෙරිකානු ජාතික කණ්ඩායමේ ප්රබල ක්රීඩකයන් සිව්දෙනෙකුට වීසා ලබා දීම ඉන්දීය බලධාරීන් විසින් ප්රතික්ෂේප කර තිබේ. මෙලෙස වීසා ප්රතික්ෂේප වී ඇත්තේ ඇමෙරිකානු පිල නියෝජනය කරන පාකිස්තාන සම්භවයක් සහිත ක්රීඩකයන්ට වීම විශේෂත්වයකි.
මෙසේ වීසා අහිමි වූ ක්රීඩකයන් අතර ඇමෙරිකානු කණ්ඩායමේ ප්රධාන වේග පන්දු යවන ක්රීඩක අලි ඛාන් ද සිටින අතර ෂයාන් ජහන්ගීර්, එහ්සාන් ආදිල් සහ මොහොමඩ් මොහ්සින් යන සෙසු ක්රීඩකයන්ට ද ඉන්දියාවට ඇතුළු වීමේ අවස්ථාව අහිමි වී ඇත. පාකිස්තාන සම්භවයක් සහිත ක්රීඩකයන් ඉන්දියාවේදී මෙවැනි වීසා ගැටලුවලට මුහුණ දුන් පළමු අවස්ථාව මෙය නොවන අතර, මීට පෙර එංගලන්ත ක්රීඩකයන් වන ෂොයිබ් බෂීර් සහ සකීබ් මහමුද්ට ද මෙවැනිම අත්දැකීම්වලට මුහුණ දීමට සිදු විය.
මෙවර ලෝක කුසලාන තරගාවලියට සුදුසුකම් ලබා ඇති එක්සත් අරාබි එමීර් රාජ්යය, ඕමානය, කැනඩාව, ඉතාලිය සහ නෙදර්ලන්තය වැනි රටවල කණ්ඩායම්වල සිටින පාකිස්තාන සම්භවයක් සහිත ක්රීඩකයන් සම්බන්ධයෙන් ද මෙවැනිම ගැටලු මතු වී ඇති අතර, ඒ පිළිබඳව ජාත්යන්තර ක්රිකට් කවුන්සිලය (ICC) වෙත පැමිණිලි ඉදිරිපත් වී ඇති බව වාර්තා වේ. තරගාවලියේ සත්කාරකත්වය ඉන්දියාව සහ ශ්රී ලංකාව බෙදා ගන්නා බැවින්, මෙම ක්රීඩකයන්ට ශ්රී ලංකාවේ පැවැත්වෙන තරග සඳහා සහභාගී වීමට අවස්ථාව ලැබුණද ඉන්දියාවේ පැවැත්වෙන තරග සඳහා සහභාගී වීමට නොහැකි වීම කණ්ඩායම්වල දක්ෂතාවලට දැඩි බලපෑමක් එල්ල කරනු ඇතැයි විචාරකයෝ පවසති.
