එළඹෙන පෙබරවාරි 07 වනදා ඉන්දියාවේදී ආරම්භ වීමට නියමිත පන්දුවාර 20-20 ලෝක කුසලාන තරඟාවලිය සඳහා සිය කණ්ඩායම ඉන්දියාවට යැවීම බංග්ලාදේශ ක්රිකට් මණ්ඩලය (BCB) නැවත වරක් ප්රතික්ෂේප කර තිබේ. ආරක්ෂක ගැටලු හේතුවෙන් තම කණ්ඩායමේ තරඟ ඉන්දියාවෙන් පිටතට ගෙන යන ලෙස කළ ඉල්ලීම සලකා බලන ලෙස අන්තර්ජාතික ක්රිකට් කවුන්සිලය (ICC) ඉල්ලීමක් කළද, බංග්ලාදේශය සිය ස්ථාවරය වෙනස් කර නොමැති බව වාර්තා වේ.
බංග්ලාදේශ ක්රිකට් මණ්ඩලය අවධාරණය කරන්නේ ක්රීඩකයින්ගේ සහ නිලධාරීන්ගේ ආරක්ෂාව සම්බන්ධයෙන් පවතින අවදානම මත මෙම තීරණය ගත් බවයි. කෙසේ වෙතත්, අන්තර්ජාතික ක්රිකට් කවුන්සිලය පෙන්වා දෙන්නේ තරඟ කාලසටහන දැනටමත් අවසන් කර ප්රකාශයට පත් කර ඇති බැවින් එහි වෙනසක් කිරීම අපහසු බවයි. එසේම ICC ය සිදුකළ අවදානම් තක්සේරුවට අනුව බංග්ලාදේශ කණ්ඩායමට ඉන්දියාව තුළ කිසිදු සෘජු තර්ජනයක් හඳුනාගෙන නොමැති බවද සඳහන් වේ.
දෙරට අතර පවතින දේශපාලන ආතතීන් මධ්යයේ බංග්ලාදේශ වේග පන්දු යවන ක්රීඩක මුස්තෆිසුර් රහ්මාන් IPL කණ්ඩායමකින් නිදහස් කිරීම සහ බංග්ලාදේශය තුළ IPL විකාශනය තහනම් කිරීම වැනි සිදුවීම් මෙම ගැටුමට මුල් වී ඇත. මේ අතර බංග්ලාදේශ ක්රීඩා අමාත්යාංශ උපදේශක අසිෆ් නස්රුල් යෝජනා කර ඇත්තේ බංග්ලාදේශයේ තරඟ ශ්රී ලංකාව වැනි විකල්ප රටකට ගෙන යන ලෙසයි. මෙම අර්බුදය හේතුවෙන් ලෝක කුසලාන තරඟාවලියට බංග්ලාදේශයේ සහභාගීත්වය පිළිබඳව මේ වන විට දැඩි අවිනිශ්චිතතාවක් මතුව තිබේ.
