” බයික් අරන් දවස් කියද…? බණ ගෙදරක යනවා කියලා ගෙදරින් ගිය පුතා ආපහු ආවේ පෙට්ටියකින්…”
හඩා වැළපෙමින් අම්මා කියූ කතාව
“බණ ගෙදරක යනවා කියා ගෙදරින් ගිය පුතා අද පෙට්ටියකින් ආපහු ආවා” යැයි පවසමින් මීවනපලාන, කොළඹයාහේන පදිංචි 40 හැවිරිදි ධර්මලතා මහත්මිය හඬා වැලපෙන්නේ යතුරුපැදි අනතුරකින් සිය එකම පුතු අහිමි වීමේ දැඩි ශෝකයෙනි. මියගිය සසිඳු දෙව්මිත් ප්රසංසන තවමත් 17 හැවිරිදි වියේ පසුවූ අතර, ඔහු මිලදී ගෙන දින කිහිපයක් පමණක් වූ, රියදුරු බලපත්රයක් හෝ නොමැති යතුරුපැදියකින් සහභාගී වූ අවසන් තරගය මෙය වනු ඇතැයි කිසිවෙකුත් නොසිතන්නට ඇත.
හොරණ-ඉංගිරිය ප්රධාන මාර්ගයේ ඉලිඹ හන්දිය අසලදී මෙම මාරක අනතුර සිදු වී තිබේ. ප්රදේශවාසීන් පවසන පරිදි, හොරණ සහ අවට ප්රදේශවල තරුණයන් රාත්රී කාලයේදී මෙම මාර්ගයේ යතුරුපැදි තරග (Races) පැවැත්වීමට පුරුදුව සිටින අතර, එදින රාත්රී 11.00ට පමණ යතුරුපැදි දෙකක් මෝටර් රථයක ගැටීමෙන් මෙම අනතුර සිදු වී ඇත. අනතුර සිදුවූ මොහොතේ රේස් පැදීමට පැමිණි අනෙකුත් මිතුරන් පලා ගොස් ඇති අතර, තුවාලකරුවන් රෝහල් ගත කිරීමට උදව් කර ඇත්තේ ප්රදේශවාසීන්ය. අනතුරින් තුවාල ලැබූ අනෙක් 22 හැවිරිදි තරුණයා මේ වන විට කොළඹ ජාතික රෝහලේ දැඩි සත්කාර ඒකකයේ ප්රතිකාර ලබමින් සිටී.
සසිඳුගේ අවසන් කටයුතු සිදු වූ දින ඔහුගේ මිතුරන් යතුරුපැදි පෙළපාලියකින් අවසන් ගෞරව දැක්වීමට කටයුතු කළ ද, අනවසර යතුරුපැදි තරග හේතුවෙන් තවත් තරුණ ජීවිතයක් රටට අහිමි වී තිබේ. රැකියාවක් කරමින් සිය පවුලට ශක්තියක් වීමට උත්සාහ කළ මෙම තරුණයාගේ වියෝව, අනවසර යතුරුපැදි තරගවල ඇති භයානකකම පිළිබඳව සමාජයට ප්රබල පණිවිඩයක් ලබා දෙයි.
