මිල්කෝ ආයතනය වසර 21කට පසුව සිය ලාභාංශ කිරි ගොවීන් අතර බෙදා දීම ආරම්භ කරමින් ‘මිල්කෝ කිරිගොවි අභිමන්’ ප්රසාද දීමනා පිරිනැමීමේ ජාතික උත්සවය ඊයේ (02) අරලියගහ මන්දිරයේදී පවත්වා තිබේ. අග්රාමාත්ය ආචාර්ය හරිනි අමරසූරිය මහත්මියගේ ප්රධානත්වයෙන් පැවැති මෙම උළෙලේදී දිවයින පුරා විසිරී සිටින කිරි ගොවීන් 22,000කට අධික පිරිසක් වෙනුවෙන් ලාභාංශ ප්රදානය කෙරුණු අතර, කිරි ගොවි රක්ෂණාවරණයක් සහ විශ්රාම වැටුප් ක්රමයක් ද හඳුන්වා දෙන ලදී. වංචාව සහ දූෂණය නතර කළ විට රාජ්ය ආයතන ලාභ ලබන තත්ත්වයට පත් කළ හැකි බව මිල්කෝ ආයතනය ප්රායෝගිකව තහවුරු කර ඇති බවත්, සියලු දෙනාට ප්රතිලාභ ලැබෙන නව පරිවර්තනීය ආර්ථික යුගයක් ගොඩනැඟීම රජයේ ඉලක්කය බවත් අගමැතිනිය මෙහිදී අවධාරණය කළාය.
