කොළඹ වරායේ සිට බහාලුම් (Containers) 323ක් අනිවාර්ය භෞතික පරීක්ෂාවට ලක් කිරීමකින් තොරව නිදහස් කිරීමේ සිද්ධිය සම්බන්ධයෙන් ශ්රී ලංකා රේගුවේ අධ්යක්ෂ ජනරාල් සීවලී අරුක්ගොඩ මහතා ඇතුළු නිලධාරීන් පිරිසකගෙන් පාර්ලිමේන්තු විශේෂ කාරක සභාව ප්රශ්න කර තිබේ. අධිකරණ සහ ජාතික ඒකාබද්ධතා අමාත්ය නීතීඥ හර්ෂණ නානායක්කාර මහතාගේ සභාපතීත්වයෙන් යුත් මෙම කාරක සභාව පසුගියදා පාර්ලිමේන්තුවේදී රැස්වූයේ තෙවන දිනටයි.
මෙම අතිශය ආන්දෝලනාත්මක සිදුවීම පිළිබඳව සොයා බලා නිර්දේශ ඉදිරිපත් කිරීම සඳහා පත්කළ මෙම කාරක සභාව හමුවේ රේගු නිලධාරීන් විසින් සිද්ධියට අදාළ සාක්ෂි ලබාදීම සිදුකරන ලදී. කාරක සභාව ආරම්භයේදී එහි සභාපතිවරයා දැනුම් දුන්නේ වරාය සහ සිවිල් ගුවන් සේවා අමාත්ය අනුර කරුණාතිලක මහතා මෙම කාරක සභාවේ සාමාජිකත්වයෙන් ඉල්ලා අස්වී ඇති බවයි. ඔහු වෙනුවට ඉදිරියේදී නව සාමාජිකයෙකු පත් කිරීමට නියමිතව ඇත.
මෙම අවස්ථාවට නියෝජ්ය අමාත්යවරුන් වන චතුරංග අබේසිංහ, සුනිල් වටගල, අර්කම් ඉල්යාස් මෙන්ම පාර්ලිමේන්තු මන්ත්රීවරුන් වන දයාසිරි ජයසේකර, අජිත් පී. පෙරේරා, ඩී. වී. චානක, මුජිබර් රහුමාන්, වෛද්ය නජිත් ඉන්දික සහ ලක්මාලි හේමචන්ද්ර යන මහත්ම මහත්මීන් සහභාගී වී සිටියහ. රේගු නීති උල්ලංඝනය කරමින් මෙතරම් විශාල බහාලුම් ප්රමාණයක් නිදහස් කිරීම හරහා රජයට සිදුව ඇති අලාභය සහ ඊට වගකිව යුතු පාර්ශව හඳුනා ගැනීමට මෙම විමර්ශනය ඉතා තීරණාත්මක වනු ඇත.
