ඇමරිකා එක්සත් ජනපදයේ දකුණු කැලිෆෝනියාවේ සන්වැලි මෛත්රී විහාරය (Sun Valley Maitri Vihara) මූලික වී සංවිධානය කරන ලද ආධාර එකතු කිරීමේ වැඩසටහනකින් රැස්කර ගත් ඇමරිකානු ඩොලර් 21,500ක (ශ්රී ලංකා රුපියල් මිලියන 6.5කට අධික) මුදලක් ‘Rebuilding Sri Lanka’ අරමුදල වෙත පරිත්යාග කර තිබෙනවා. 2025 දෙසැම්බර් මාසයේ ශ්රී ලංකාවට බලපෑ ‘දිට්වා’ (Ditwah) සුළි කුණාටුවෙන් සිදු වූ විනාශය යථා තත්ත්වයට පත් කිරීම සඳහා රජය විසින් පිහිටුවා ඇති මෙම අරමුදලට විදේශීය විහාරස්ථානයකින් ලැබුණු සුවිශේෂී දායකත්වයක් ලෙස මෙය සැලකෙනවා.
පෙබරවාරි 4 වැනිදාට යෙදුණු ශ්රී ලංකාවේ 78 වැනි ජාතික නිදහස් දින සැමරුමට සමගාමීව මෙම මුදල් ප්රදානය සිදු කර ඇති අතර, සන්වැලි මෛත්රී විහාරයේ විහාරාධිපති ආචාර්ය අපරැක්කෙ පුඤ්ඤසිරි හිමියන්ගේ අනුශාසකත්වයෙන් මෙය සංවිධානය කර තිබුණා. අදාළ මූල්ය පරිත්යාගය දකුණු කැලිෆෝනියාවේ ශ්රී ලංකා කොන්සල් ජනරාල්වරයා වෙත නිල වශයෙන් භාර දීම සිදු කෙරුණු අතර, අසීරු අවස්ථාවලදී විදේශගත ශ්රී ලාංකිකයින් තම මව්බිම කෙරෙහි දක්වන ලැදියාව මෙයින් මනාව පිළිබිඹු වන බවයි කොන්සල් කාර්යාලය සඳහන් කළේ.
